ئەنجومەنی پارێزگای كەركوك كۆدەبێتەوە دیزاینی بنەڕەتی كەركوك تەوەرێكی كۆبوونەوەكە دەبێت

SNN-عەلی حەمە سەعید

بڕیارە سبەی سێشەممە ئەنجومەنی پارێزگای كەركوك، حەوتەمین كۆبوونەوەی خۆی لەسەر چەند پرسێك ئەنجامبدات و تێیدا میوانداری فەرمانگەی ئەندازیاری و فەرمانگەی كارەبای كەركوك بكات.

د.ئەحمەد كەركوكی، ئەندامی ئەنجومەنی پارێزگای كەركوك لە فراكسیۆنی یەكێتی بە SNNی ڕاگەیاند: لەدرێژەی كاروكۆبوونەوەكانی ئەنجومەنی پارێزگای كەركوك سبەی سێ‌شەممە حەوتەم كۆبوونەوەی ئەنجومەنی پارێزگا ئەنجام دەدەین، بەپێی كارنامەی كۆبوونەوەكەش میوانداری فەرمانگەی ئەندازیاری نیشتەجێی پڕۆژە و راوێژكاران بۆ پڕۆژەی دیزاینی بنەڕەتی شاری كەركوك دەكەین.

ئاماژەی بەوەشكرد، هەرلەكۆبوونەوەكەی سبەینێدا میوانداری فەرمانگەی دابەشكردنی كارەبای كەركوك دەكرێت، ئەوەش بەمەبەستی بەدواداچوون لەبارەی خزمەتگوزاری كارەبا خستنەڕووی كێشە و گرفتەكانیان.

ئەم دوو میواندارییە لەكاتێكدایە كەبڕیار بوو لەكۆبوونەوەی رابردووی ئەنجومەنی پارێزگای كەركوك ئەنجامبدرێن، بەڵام بۆ كۆبوونەوەی سبەینێ‌ 5-11-2024 دواخرا.