“یەكێتی بە ستراتیژێكی نوێوە هەنگا و بەرەو پێكهێنانی حكومەت دەنێین”
لۆگۆى یەکێتیی نیشتمانیی کوردستان | فۆتۆ: SNN
SNN-عەلی حەمەسەعید
ئەندامێكی سەركردایەتی یەكێتی ئاماژە بەوەدەكات ناكرێت كابینەی داهاتووی حكومەت وەك كابینەی ئێستا بەردەوامبێت، بۆ ئەو مەبەستەش یەكێتی سیاسەتی خۆسەپێنی ڕەتدەكاتەوە و بە ستراتیژێكی نوێوە هەنگاو بەرەو پێكهێنانی حكومەت دەنێین.
مەلا كەریم شوكر، ئەندامی سەركردایەتی یەكێتی نیشتمانی كوردستان بەSNN ی راگەیاند: بەپێی ئەنجامی دەنگدان هیچ لایەنێك ناتوانێت بەتەنها حكومەتی داهاتووی هەرێمی كوردستان پێكبهێنێت، بەڵكو شەراكەتی نێوان لایەنەكانی دەوێت، بۆ ئەمەش یەكێتی كە هێزێكی كاریگەرە لەهەرێم و عیراق و تەنانەت ناوچەكەش، گۆڕانكاری لە ئەدای حكومەت و حكومەتێكی بێ بەجیاكاری و خۆسەپێنی و بڕیاری شەخسی دەوێت، كە ئەمەش داواكاری كۆمەڵانی خەڵكی كوردستانە.
ئاماژەی بەوەشكرد، كاتی خزمەتكردنی خەڵكە و ناكرێت كابینەی داهاتووی حكومەت وەك كابینەی ئێستابێت و لە جیاكاری و خۆسەپێنی بەردەوامبێت، بەڵكو یەكێتی ئەو سیاسەتەی رابردوو رەتدەكاتەوەو حكومەتێكی خزمەتكاری خەڵكی بۆ كابینەی داهاتوو دەوێت.
ئەو ئەندامەی سەركردایەتی یەكێتی ئەوەشی خستەڕوو، یەكێتی نیشتمانی كوردستان بە ستراتیژێكی نوێوە هەنگا و بەرەو پێكهێنانی حكومەت دەنێت و نایەوێت ئەزموونی حوكمڕانییە تاكڕەوەكەی رابردوو دووبارە ببێتەوە، بۆیە هەوڵی یەكێتی بۆ پێكهێنانی حكومەتێكی نیشتمانی بەرپرسیارە بەرامبەر هاووڵاتییەكانی، كە ئەمەش داواكاری خەڵكە و دەبێت لە كابینەی داهاتووی حكومەتی هەرێمی كوردستاندا تەواو رەنگبداتەوە.
