سێ راوچی لەسەر راوکردنی باڵندەکێوییەکان دەستگیرکران

SNN

بەڕێوەبەرایەتیی پۆلیسی داستانی سلێمانی رایگەیاندووە، سێ راوچی لەسەر راوکردنی ئاژەڵ و باڵندە کێوییەکان لە سنووری ئاغجەلەر دەستگیرکردووە، دەڵێت “راوچییەکان رووبەڕووی رێکاریی یاسایی دەبنەوە”.

ئەمڕۆ سێشەممە 5ی تشرینی دووەم، بەڕێوەبەرایەتیی پۆلیسی ژینگە و دارستانی سلێمانی رایگەیاندووە، لە ئەنجامى دەرچوونى مەفرەزەکانى بنکەى پۆلیسى دارستانى ئاغجەلەر بۆ سنوورى گوندى (تووتەقەڵ ) توانیان سێ راوچى دەستگیربکەن کە سەرقاڵى راوکردنى باڵندەى کێوى بوون.

ئاماژەی بەوەکردووە، لەو هەڵمەتەدا توانیان دەستبەسەر  چوار لایتى دەستى و دوو تۆڕ و 9 باڵندەى سویسکەدا بگیرێت و دواتریش باڵندەکان جارێکى تر گەڕانەوە سرووشت و ئازادکران.

هاوکات، بەڕێوەبەرایەتییەکە داوا لە هاوڵاتییان دەکات، لە راوکردنى ئاژەڵ و باڵندە کێویەکان بە هەموو جۆرێک دووربکەونەوە، چونکە قەدەغەیە و هەر کەسێک راوبکات رووبەڕوى یاسا دەبێتەوە.