بڕیاردەری فراكسیۆنی یەكێتی: سەرۆكوەزیران و هەموولایەنەكان دەبێت پابەندبن بەبڕیارەكانی دادگای فیدراڵی

SNN-عەلی حەمە سەعید

بڕیاردەری فراكسیۆنی یەكێتی لە پەرلەمانی عێراق ئاماژە بەوەدەكات بڕیارەكانی دادگای فیدراڵی بڕیاری كۆتایین و هیچ كەسێك مافی ئەوەی نییە لێكدانەوەی جیاوازیان بۆبكات بەڵكوو دەبێت هەموو لایەك بەسەرۆكوەزیرانیشەوە پێوەی پابەند ببن.

كاروان یاروەیس، بڕیاردەری فراكسیۆنی یەكێتی لە ئەنجومەنی نوێنەرانی عێراق بە SNNی ڕاگەیاند: هەوڵەكانمان بە ئاراستەی جیبەجێكردنی بڕیارەكانی دادگای فیدراڵی بەردەوامی هەیە و لەو چوارچێوەیەشدا لەگەڵ لایەنە پەیوەندیدارەكانی عێراق كۆبووینەتەوە بەتایبەت سەرۆكوەزیرانی عێراق و  پارێزگاری بانكی ناوەندی، هاوكات واژۆی 138 پەرلەمانتارو سەرۆك فراكسیۆنمان ئاراستەی ئەو لایەنانە كردووە.

ئاماژەی  بەوەشكرد، داواكاری ئێمە و ئەو پەرلەمانتارانەی كە واژۆیان لەسەر یاداشتێكی ئێمە كردووە بۆ ئەوەیە كە سەرۆكوەزیرانی عێراق و سەرجەم لایەنەكانی دیكە پابەند بكەین بە جێبەجێكردنی بڕیارەكانی دادگای فیدراڵی تایبەت بە تەوتینی مووچەی فەرمانبەرانی هەرێم، هاوكات داواكاری مووچەخۆرانی هەرێمی كوردستانمان گەیاندووەتە سەرۆكوەزیران بۆ جێبەجێكردنی بڕیاری دادگای باڵای فیدرالی بۆ تەوتین لەرێگای بانكە فیدرالیە حكومیەكانەوە.

بڕیاردەری فراكسیۆنی یەكێتی لە پەرلەمانی عێراق ئەوەشی خستەڕوو، بڕیارەكانی داگای فیدراڵی بڕیاری یەكلاكەوە و كۆتایین و هیچ كەسێك مافی ئەوەی نییە لێكدانەوەی جیاوازیان بۆبكات بەڵكوو دەبێت هەموو لایەك بەسەرۆكوەزیرانیشەوە پێوەی پابەند ببن، هاوكات لە بڕیارەكەی دادگای فیدراڵیش ئەوە هاتووە كە دەبێت مووچەی فەرمانبەرانی هەرێم لە بانكە فیدراڵییەكان تەوتین بكرێت، بەبێ‌ ئەوەی بە یەك وشەش باسی پرۆژەی هەژماری من بكات.