سبەینێ هاوکاری هاوپەیمانان بۆ مانگی 10 دابەشدەکرێت

SNN

وەزارەتی پێشمەرگە رایگەیاند، سبەینێ هاوكاری دارایی هاوپەیمانی نێودەوڵەتی بۆ مانگی 10، بەسەر هێزەكانی پێشمەرگە دابەشدەكرێت كە بڕەكەی 407 هەزار دینارە.

ئەمڕۆ چوارشەممە 6ی تشرینی دووەم، وەزارەتی پێشمەرگە لە راگەیەندراوێكدا ئاشکرایکرد، دوای ئەوەی هاوكاری هێزەكانی هاوپەیمانان بۆ هێزی پێشمەرگە خرایە سەر هەژماری وەزارەتی پێشمەرگە.

ئاماژەی بەوەکردووە، بەڕێوەبەرایەتی گشتی بودجە و بەرنامەكان “ژمێریاری سەربازی”، ڕێكارە دارایی و ژمێریارییەكانی ئەنجامداوە و لە سبەینێوە پێنجشەممە 7ی تشرینی دووەم هاوكارییەكە بۆ مانگی 10 دابەشدەكرێت.

هاوکات، ئەو هاوكارییەی هاوپەیمانانی نێودەوڵەتی بۆ هێزی پێشمەرگەی كوردستان تەرخانیكردووە بڕەكەی زیاتر لە 13 ملیار دینارە و هەر پێشمەرگەیەك 407 هەزار دینار وەردەگرێت.