گەردونناسێک یەکەم رۆژی مانگی رەمەزانی دیاریکرد

SNN

شارەزایەکی کەشناسی و گەردوونی رایگەیاندووە، یەکەم رۆژی مانگی رەمەزان دەکەوێت 1ی ئازارەوە، دەڵێت “هۆکارەکەی ئەوەیە مانگی شوبات 28 رۆژە”.

سالار حاجی عەلی، شارەزا لە بواری کەشناسی و گەردوونناسی بە SNNی راگەیاند، یەکەم رۆژی مانگی ڕەمەزانی پیرۆز لە 1ی ئازاری 2025 دەبێت، چونکە ڕۆژی 28ی شوبات، لە کاتژمێر 03:44:43 بەرەبەیان  مانگ نوێ دەبێتەوە.

دەڵێت “بۆ ئێوارەی ڕۆژی 28ی مانگی شوبات، مانگ دەبینرێت، بۆ ڕۆژی  1ی مانگی ئازار یەکەم ڕۆژی مانگی ڕەمەزانی پیرۆز دەبێت”

ئاماژەی بەوەکردووە، جەژنی ڕەمەزانی پیرۆز بۆ ساڵی داهاتوو لە 30ی ئازاری 2025 بۆ 31  مانگ دەمێنێتەوە، چونکە ڕۆژی 29ی ئازاری 2025 لە کاتژمێر 13:57:47s دوای نیوەڕۆ مانگ نوێ دەبێتەوە.

سەبارەت بە یەکەم رۆژی مانگی رەمەزان ئاشکرایکردووە، “ئەگەر حکومێک بڕیاری لەسەردا  بە ئامێری زۆر تایبەتی گەردوونناسی لە  ڕۆژی 29ی مانگی ئازار، وتیان مانگ بینراوە، ئەوکات مانگ تا کاتی بانگی ئێوارە تەمەنی نزیک چوار کاتژمێر و نیو دەبێت، بۆ ڕۆژی دوایی 30 ئازار  دەبێتە یەکەم ڕۆژی جەژنی ڕەمەزان، ئەگەر بڕیاری لیژنەی فەتوا بە هۆی کەمی تەمەنی لە دایکبوونی مانگ مانەوەی لە نێو تیشکی خۆر یان خراپی کەش و هەوا بڵێن مانگ نەبینراوە، ئەوە بۆ ڕۆژی 30ی ئازار ناکرێت بە جەژنی ڕەمەزانی پیرۆز.”

ئەو گەردوونناسە روونیشیکردووەتەوە، “مانگ ئێوارەی ڕۆژی 30 ی مانگ دەتوانرێت لە تەمەنی مانگ 28بۆ 29کاتژمێر لە دایکبوو زۆر بەئاسانی دەبینرێت، لە سەر ئاستی عێراق و هەرێمی کوردستان  دواتر  بۆ ڕۆژی 31ی مانگی  ئازار بە بڕیاری کۆتایی دەبێت، دەکرێت بە یەکەم ڕۆژی جەژنی ڕەمەزانی پیرۆز لەگەڵ ئەوەشدا مانگی ڕەمەزانی پیرۆزی ساڵی داهاتوو لە بەینی 29بۆ 30 ڕۆژ دەمێنێتەوە.”