ئەمڕۆ كۆمیسیۆن وەڵامی سەرجەم تانەی ئەنجامەكانی هەڵبژاردن دەداتەوە

SNN-عەلی حەمە سەعید

وتەبێژی كۆمسیۆنی باڵای سەربەخۆی هەڵبژاردنەكانی عێراق ئاماژە بەوەدەكات، تا ئێستا وەڵامی 40 تانەمان داوەتەوە كە لەلایەن لیست و كاندید و لایەنە سیاسییەكان لەسەر راگەیاندنی ئەنجامی كۆتایی هەڵبژاردنەكان تۆماركرابوو هەر ئەمڕۆش وەڵامی سەرجەمیان دەدەینەوە كە ژمارەیان 41 تانەیە.

جومانە غەلای وتەبێژی كۆمسیۆنی باڵای سەربەخۆی هەڵبژاردنەكانی عیراق بە SNNی ڕاگەیاند: لە كۆی ئەو 41 تانەیەی كە لەسەر ئەنجامەكانی هەڵبژاردنی خولی شەشەمی پەرلەمانی كوردستان تۆماركرابوون، تا دوێنێ‌ وەڵامی 40 تانەمان داوەتەوە و ئەمڕۆش وەڵامی تانەكەی دیكە دەدەینەوە و بەوجۆرەش كۆتایی بە وەڵامی تانەكانی لایەنە سیاسییەكان دێت.

ئاماژەی بەوەشكرد، بەپێی یاسای كۆمسیۆن دوای وەڵامدانەوەی تانەكان لەلایەن كۆمسیۆنەوە، دواتر دەستەی دادوەری هەڵبژاردن تانەكان لە ماوەی 10 رۆژی كاركردندا یەكلادەكاتەوە و دواتریش ئەنجومەنی كۆمیسیاران ئەنجامی كۆتایی هەڵبژاردن پەسەند دەكات.

ئەوەش لەكاتێكدایە كە لەدوای ڕاگەیاندنی ئەنجامی هەڵبژاردنەكانی 20ی مانگی ڕابردوو، چەند لایەنێكی سیاسی ئەنجامەكانیان ڕەتكردەوە و پێیان وابوو كە ساختەكاری كراوە، هاوكات كۆمەڵی دادگەریش بڕیاریداوە كە نەچنە پەرلەمانی كوردستان و كورسییەكانیان بۆ لایەنەكانی دیكە جێبهێڵن كە ژمارەیان سێ‌ كورسییە.