قائیمقامی شارەزوور دڵنیایی دەدات لە پاكبوونەوەی ئاوی خواردنەوەی سنورەكە و كۆنترۆڵكردنی سكچوون و ڕشانەوە

SNN-عەلی حەمە سەعید

قائیمقامی قەزای شارەزوور ئاماژە بەوەدەكات, دوای هاتنی 48 پزیشك و پسپۆڕ لە سلێمانیەوە بە مەبەستی لێكۆڵینەوە لە نەخۆشكەوتنی ژمارەیەكی زۆر هاوڵاتی سنورەكەمان دەركەوت ئاوی خواردنەوەی سنورەكە تێكەڵ بە ئاوەڕۆی چەند گەڕەكێك بووە و ئەوەش بووەتە هۆی نەخۆشكەوتنی بەشێكی دانیشتوانی ناوچەكەمان، بەڵام ئێستا دۆخەكە كۆنترۆڵكراوە.

رزگار غەفور، قائیمقامی قەزای شارەزوور بە SNNی ڕایگەیاند، دوای ئەوەی لە هەفتەی ڕابردوو نەخۆشی سكچوون و ڕشانەوە بە شێوەیەكی بەرفراوان لە سنورەكەماندای بڵاوبوویەوە، بەڵام دوای هاتنی 48 پزیشكی پسپۆڕ لە سلێمانیەوە بە مەبەستی لێكۆڵینەوە لە نەخۆشكەوتنی ژمارەیەكی زۆر هاوڵاتی سنورەكەمان دەركەوت ئاوی خواردنەوەی سنورەكە تێكەڵ بە ئاوی مەجاری بووە و ئەوەش بووەتە هۆی نەخۆشكەوتنی بەشێكی دانیشتوانی ناوچەكەمان.

ئاماژەی بەوەشكرد، دوای دەركەوتنی پشكنینەكان لە ڕێگەی تیمەكانمانەوە توانراوە بۆری سەرەكی ئاوی ناوچەكەمان كە لە 11 شوێن شكابوو ئەوەش ببوە هۆی تێكەڵبوونی ئاوی خواردنەوە بە ئاو ئاوەڕۆی چەند گەڕەكێكی سنورەكە، بەڵام دواجار توانیمان ئەوەش چارەسەر بكەین.

قائیمقامی قەزای شارەزوور ئەوەشی خستەڕوو، دڵنیای دەدەینەوە دانیشتوانی سنورەكەمان لە ئێستادا ئاوی سنورەكەمان هیچ گرفتێكی نیە و گونجاوە بۆ بەكارهێنان، داواكارین لایەنە پەیوەندیدارەكان چارەسەری تۆڕی ئاوی ناوچەكەمان بكەن چونكە زۆر كۆنە و هەمیشە مەترسی تێكچوونی لەسەرە.