لە دهۆک بەهۆی ڕەخنەگرتن خوێندکارێکی ماستەر دەستگیرکرا
عەلی حەمەسەعید-SNN
خوێندکارێکی ماستەر لە سنووری پارێزگای دهۆک بەناوی ئاراس حسێن دەستگیرکرا، بەهۆی ئەوەی دوورخراوەتەوە لە خوێندن لە گرتە ڤیدیۆیەکدا رەخنەی لە حکومەت و سەرۆک بەشی زانکۆکەی گرتووە دادگا بڕیاری دەستگیرکردنی داوە.
ئارام حسێن، برای( ئاراس حسێن) کە دەستگیرکراوە بە SNNی ڕاگەیاند:براکەم خوێندکاری ماستەر بووە لە بەشی زانستە سیاسییەکانی زانکۆی دهۆک تەنها بەهۆی دوو رۆژ نەچوونی بۆ زانکۆ بڕیاری دوورخستنەوەی دراوە، دواتر براکەم لە گرتە ڤیدیۆیەکدا تووڕە بووە و ناڕەزایەتی دەربڕیوە و ئەو بڕیارەی بە نایاسایی و سیاسی ناوبردووە، وتویەتی، ئەو بڕیارە لەلایەن حزبەوە دراوە، چونکە سەرۆک بەشەکەی پارتییە
ئاماژەی بەوەکرد، “بەهۆی بڵاوبوونەوەی ئەو گرتە ڤیدیۆییە سکاڵا لەسەر براکەم تۆمارکراوە ، بەمەبەستی وتە لێوەرگرتن چووەتە بنکەی پۆلیس و دواتریش نێردراوە بۆ دادگا، بەڵام لەوێ بڕیاری دەستگیرکردنی دراوە.
برای ئەو خوێندکارە دەستگیرکراوەئەوەشی خستەڕوو، لە ئێستا لە گرتووخانەی دهۆک راگیراوە و رێگەش نادرێت بە کەفالەت ئازادبکرێت، چونکە کەیسەکەی بە سیاسی کراوە.
