ئەمڕۆ ناوی ئەو کەسانە رادەگەیەنرێت کە وەک بژمێر لە پڕۆسەی سەرژمێری گشتیدا کاردەکەن

SNN

ئەمڕۆ ناوی زیاتر لە 15 هەزار كەس وەك بژمێر بۆ پڕۆسەی سەرژمێری گشتی رادەگەیەنرێت، كە پێشتر فۆڕمی دامەزراندنیان پڕكردبووەوە.

ئەمڕۆ چوارشەممە 13ی تشرینی دووەم، شوان جەبار، یاریدەدەری سەرۆكی ژووری ئۆپراسیۆنی سەرژمێری گشتی دانیشتوان لە هەرێمی كوردستان رایگەیاند، بە ئەگەرێكی زۆرەوە ئەمڕۆ ناوی بژمێرەكان رادەگەیەنرێن، کە بۆ ئەو پڕۆسەیەش پێویستیان بە 15 هەزار کەسە.

ئاماژەی بەوەکردووە، و زۆربەی كێشە تەكنیكییەكانی تایبەت بە پڕۆسەی سەر ژمێری گشتی چارەسەر کراون و ناوی بژمێرە وەرگیراوەکانیش رادەگەیەنرێت.

هاوکات، پێشتر نزیكەی 61 هەزار دەرچووی زانكۆ و پەیمانگەكان فۆڕمیان بۆ كارمەندی بژمێر لە پڕۆسەی سەرژمێری دانیشتوان پڕكردبووەوە لە کاتێکدا پڕۆسەکە پێویستی بە تەنها زیاتر لە 15 هەزار كەسە.

وابڕیاریشە لە رۆژانی 20 و 21ی تشرینی دووەمدا کە دەکاتە چوارشەممە و پێنجشەممەی هەفتەی داهاتوو، سەرژمێری گشتی دانیشتوان لە عێراق و هەرێمی كوردستان ئەنجامبدرێت و ئەو دوو رۆژەش قەدەغەی هاتوچۆ دەبێت، هاوکات دوای شەش هەفتەش لە سەرژمێریکردنەکە ئەنجامەكەی رادەگەیەنرێت جگە لە ناوچە جێناكۆكەكان.