راگەیەندراوێک لە نووسینگەی سودانییەوە لەسەر مووچەی فەرمانبەران

SNN-

نوسینگەی سەرۆک وەزیرانی عێراق رایگەیاند، سەرۆکوەزیرانی عێراق لە هەولێر لەگەڵ سەرۆکی حکومەتی هەرێمی کوردستان کۆبووەتەوە باسیان لە گرنگی جێبەجێکردنی بڕیارەکەی دادگای فیدراڵی لەبارەی مووچە و هەناردەی نەوتی هەرێم و پێکهێنانی حکومەتی نوێی هەرێم و سەرژمێری گشتی کردووە.

ئەمڕۆ چوارشەممە، نوسینگەی سەرۆکوەزیرانی عێراق بڵاویکردەوە، محەمەد شیاع سودانی سەردانی هەرێمی کوردستانی کردووە و لەگەڵ مەسرور بارزانی سەرۆکی حکومەتی هەرێمی کوردستان کۆبووەتەوە و جەختی لە جێبەجێکردنی بڕیارەکەی دادگای فیدراڵی کردووەتەوە بۆ دابەشکردنی مووچەی مووچەخۆران لەرێگەی بانکە فیدراڵییەکانەوە و لە کاتی خۆیدا.

لە راگەیەندراوەکەدا هاتووە لە کۆبوونەوەکەدا سودانی پیرۆزبایی سەرکەوتنی هەڵبژاردنی هەرێمی کردووە و جەختی لە گرنگی پاراستنی سەقامگیری سیاسی لە هەرێم و گرنگی پێکهێنانی حکومەتێکی نوێ بۆ هەرێم و بەردەوامی پەیوەندییەکانی نێوان هەرێم و بەغدا کردووەتەوە.

دەشڵێت:” لە کۆبوونەوەکەدا باس لە پێویستی دەستپێکردنەوەی هەناردەی نەوتی هەرێم و رێکخستنی کراوە بەجۆرێک خزمەتی هاوڵاتیانی هەرێم و عێراق بکات، هەروەها باس لە ئامادەکارییەکان بۆ سەرژمێری گشتی و هەوڵەکان بۆ سەرخستنی سەرژمێرییەکە کراوە”.