وەزیری پلاندانان: سەرژمێری گشتی بەشە بودجەی هەرێمی كوردستان یەكلادەكاتەوە

SNN-

وەزیری پلاندانانی حکومەتی هەرێمی کوردستان رایگەیاند، سەرژمێری 1957 دەكرێتە بنەما بۆ سەرژمێری گشتی 2024 لە ناوچە كوردستانیەكانی دەرەوەی هەرێم و هەموو ئەو سەرژمێریانەی لەدوای 1957-وە كراون لەوناوچانە هەڵدەوەشێنرێنەوە.

دارا رەشید، وەزیری پلاندانانی حكومەتی هەرێم لە كۆنگرەیەكی رۆژنامەوانیدا رایگەیاند،
لە دانیشتمان لەگەڵ سەرۆك وەزیرانی عێراق، تێبینیەكانمان لەبارەی سەرژمێری خستەڕوو و پێمان وت كێشەی ئێمە لەگەڵ عێراق لەبارەی سەرژمێری مادەی (140)ە و، نابێت سەرژمێری لەوناچانە بسەپێندرێت.

وتیشی: سەرژمێری گشتی بەشە بودجەی هەرێمی كوردستان یەكلادەكاتەوە.

راشیگەیاند، ترسی ئێمە دەستوری و یاسایی بووە، بەهۆی ئەو پێداگرییەی كردمان دەتوانم بڵێم یەكەمجارە لە دوای پەسەندكردنی دەستوری عێراق لە 2005-وە، سەرژمێری (1957) بكرێتە بنەما بۆ سەرژمێری گشتی لەناوچە كوردستانیەكانی دەرەوەی هەرێم.

لەسەرژمێرییەكانی دوای 1957، غەدر لەكوردو توكمان و مەسیحی و كلدۆ ئاشوری كراوە، بۆیە بڕیارەكەی ئەنجومەنی زۆرگرنگەو هێزی یاسایی هەیە و هەموو ئەو سەرژمێرییانەی لەدوای 1957-وە كراوە، رەشدەكرێتەوە، خراپترینیان سەرژمێری 1997 كە رێژەی كوردی كردووەتە 20% لەكاتێكدا لە ساڵی 1957 سەدا پەنجا بووە لەوناوچانە.