وردەكاری بڕی ئەو پاداشتەی دەدرێتە مامۆستا و دەرچووانی زانكۆ و پەیمانگاكان كە پرۆسەی سەرژمێری بەڕێوەدەبن

SNN-عەلی حەمە سەعید

لە ئەمڕۆوە قۆناغەكانی پرۆسەی سەرژمێری گشتی لە عێراق و هەرێمی كوردستان دەستپێكردووە و بۆ ئەومەبەستەش ناوی 19 هەزار دەرچووی زانكۆو پەیمانگاكان ڕاگەیەندراوە بۆ ئەوەی ئەو پرۆسەیە بەڕێوە ببەن، بەرێوەبەری جێبەجێكاری پرۆسەكەش وردەكاری بڕی پاداشتی بژمێرەكان دەخاتەڕوو.

مەحموود عوسمان، بەڕێوەبەری جێبەجێكاری سەرژمێری لە هەرێمی كوردستان بە SNNی ڕاگەیاند: لە ئەمڕۆوە قۆناغەكانی سەرژمێری لە عێراق و هەرێمی كوردستان بەشێوەیەكی كردەیی چووەتە بواری جێبەجێكردنەوە، بۆ ئەومەبەستەش ماوەی دوو مانگە 700 مامۆستا و هەروەها ماوەی مانگێكیشە هەزار و 574 مامۆستای دیكە لە پرۆسەی گەمارۆسازیدا لەگەماڵ كاردەكەن.

ئاماژەی بەوەشكرد، لەچەند ڕۆژی ڕابردووشدا 19 هەزار دەرچووی زانكۆ و پەیمانگاكان ناویان بۆ بوون بە بژمێر گەڕاوەتەوە، پڕۆسەی راهێنانپێكردنیان دوێنێ دەستیپێكردوە و تا سبەینێ‌ ڕاهێنانەكانیان بەردەوام دەبێت، هاوكات جگە لە مووچەی مانگانە كە بڕەكەی 250 هەزار دینارە، بۆ هەر رۆژێكی راهێنانیش بڕی 10 هەزار دینار بۆ بژمێرەكان هەژمار دەكرێت، هاوكات سەرجەم بژمێر و مامۆستاكان تا 31/12/2024 لەگەڵمان دەمێننەوە بۆ هەرمانگێكیش بڕی 250 هەزاردینار وەردەگرن.

بەڕێوەبەری جێبەجێكاری سەرژمێری لە هەرێمی كوردستان ئەوەشی خستەڕوو، لە عێراق ئەو مامۆستایانەی لە پڕۆسەی گەمارۆسازی و ژمارەلێدان بەشداربوون لە سەرژمێرییدا وەك بژمێر كاریان پێدەكرێت، بەڵام ئێمە لە شارەكاندا دەیانكەینە بەرپرسی بلۆك، یان بەڕێوەبەری گەڕەك، لە گوندەكانیشدا هەر مامۆستایەك بەگوێرەی ژمارەی دانیشتووانی گوندەكە 3 بۆ 5 گوندی رادەست دەكرێت.