جومانە غەلای: وەڵامی سەرجەم تانەكان درایەوە

SNN-عەلی حەمە سەعید

وتەبێژی كۆمیسیۆنی باڵای سەربەخۆی هەڵبژاردنەكانی عێراق ئاماژە بەوەدەكات ئەمڕۆ دەستەی دادوەری هەڵبژاردن سەرجەم تانەكانی لەبارەی هەڵبژاردنی پەرلەمانی كوردستان یەكلایی كردەوە و سەرجەمیشیان ڕەتكراونەتەوە.

جومانە غەلای، وتەبێژی كۆمیسیۆنی باڵای سەر بەخۆی هەڵبژاردنەكانی عێراق بە SNNی ڕاگەیاند: لەكۆی ئەو 41 تانەیەی كە لەلایەن ژمارەیەك لە لایەنی سیاسییەوە لە ئەنجامەكانی هەڵبژاردن درابوون، ئەمڕۆ سەرجەمیان یەكلایی كرانەوە، بەجۆرێك سەرجەم تانەكان لەبارەی هەڵبژاردنی پەرلەمانی كوردستان رەتكراوەنەتەوە.

ئاماژەی بەوەشكرد، هەفتەی پێشوو ئەنجامی 38 تانەی پێشكەشكراو لە دژی ئەنجامی هەڵبژاردنی خولی شەشەمی پەرلەمانی كوردستان، لەلایەن دەستەی دادوەریی هەڵبژاردنەكانەوە یەكلاییكرایەوە و ئەمڕۆش ئەنجامی سێ‌ تانەكەی دیكە یەكلایی كرایەوە بەوجۆرەش سەرجەم تانەكان یەكلا كراونەتەوە.

یەکلایی كردنەوەی تانەكان لەكاتێكدایە كە دوای راگەیاندنی ئەنجامی فەرمی هەڵبژاردنی خولی شەشەمی پەرلەمانی كوردستان، لایەنە سیاسییەكان و بەربژێرەكان 41 تانەیان لەسەر ئەنجامی هەڵبژاردنەكە پێشكەشكرد، بەجۆرێك 25 تانە لە سلێمانی، 12 تانە لە هەولێر، سێ تانە لە دهۆك و لە هەڵەبجەش تانەیەك پێشكەشكراو سەرجەمیشام رەتكرانەوە.