وەزارەتی دەرەوەی عێراق لە بارەی هەڕەشەكانی ئیسرائیل راگەیەنراوێكی بڵاوكردەوە
ئاڵاى كۆمارى عهرهبى عێراق و ئیسرائیل | ئیڵوسترهیشن: Ed Woodhouse/Al-Monitor
SNN-
عێراق داوا لە كۆمەڵگەی نێودەوڵەتی دەكات هەڕەشەكانی ئیسرائیل بۆ سەر وڵاتەكەی رابگرێت دەشڵێت:”ئیسرائیل دەیەوێت بازنەی ئاڵۆزییەكان بەرفراوان بكات.
وەزارەتی دەرەوەی عێراق لە راگەیەنراوێكدا ئاماژەی بەوەكردووە، نامەیەكیان ئاڕاستەی ئەنجومەنی ئاسایشی نێودەوڵەتی و سكرتێری گشتی نەتەوە یەكگرتووەكان و كۆمكاری عەرەبی كردووە لە بارەی هەڕەشەكانی ئیسرائیل بۆ سەر عێراق.
دەشڵێت، لە نامەكەدا جەختكراوەتەوە عێراق گرنگی بە سەقامگیری ناوچەكە و جیهان دەدات و پابەندە بە پەیماننامەی نەتەوە یەكگرتووەكان و هەڕەشەكانی ئیسرائیلیش بۆ دروستكردنی پشێوییە لە ناوچەكەدا و دەیەوێت رەوشەكە ئاڵۆزتر ببێت.
راشیگەیاندووە، عێراق پەنادەباتە بەر كۆمەڵگەی نێودەوڵەتی بۆئەوەی بڕیارێكی دروست بدرێت و رێگری لە ئیسرائیل و هەڕەشەكانی بكرێت كە بنەماكانی یاسا نێودەوڵەتییەكان پێشێل دەكات و داواش دەكات نامەكەی گشتاندنی بۆ بكرێت بۆ هەموو لایەنە پەیوەندیدارەكان.
