ئەمڕۆ ئەنجوومەنی وەزیران کۆدەبێتەوە و تاوتوێی پرسی مووچە دەکات

ئەمڕۆ ئەنجوومەنی وەزیرانی هەرێم کۆدەبێتەوە و تاوتوێی چەند تەوەرێکی گرنگ دەکات، لەوانە پرسی سێ مووچەکەی ئەمساڵ.

ئەمڕۆ چوارشەممە، 27ی تشرینی دووەم، ئەنجوومەنی وەزیرانی هەرێمی کوردستان کۆدەبێتەوە و تاوتوێی سێ پرسی گرنگ دەکات.

لە تەوەری یەکەمدا، تاوتوێکردنی پرسی سێ مووچەی کۆتایی ئەمساڵ و کێشە و گرفتەکانی بەردەم خەرجکردنی لە بەغدا و چارەسەرەکان.

تەوەری دووەمی کۆبوونەوەکە بریتی دەبێت لە خستنەڕووی ڕاپۆرتێک لەلایەن وەزیری پلاندانان سەبارەت بە بەڕێوەچوونی قۆناغی یەکەمی سەرژمێریی گشتیی دانیشتووان، كه‌ لە ڕۆژانی 20 بۆ 21 مانگی یازده‌ی ئه‌مساڵ لە عێراق و هەرێمی كوردستان به‌ڕێوه‌چوو و هه‌روه‌ها قۆناغ و هەنگاوەكانی دیكەی پرۆسەكه‌ ده‌خرێته‌ به‌رباس و گفتوگۆكردن.

هاوکات کۆتا تەوەریش، پرۆژە بڕیارێكی پێشنیازكراو لەلایەن وەزارەتی شارەوانی و گەشتوگوزارەوە ده‌خرێته‌ ڕوو سەبارەت بە پاژەكردن یان (پێدان بە قیست)ی ئەو بڕە پارەیەی كە لە زیادەڕۆكار وەردەگیرێت كە بە زێدەڕۆیی خانووی نیشتەجێبوونی لە سنووری شارەوانییەكان دروست كردووە.