ئەمڕۆ یەکەمین کۆبوونەوەی دانیشتنی پەرلەمانی کوردستان بەڕێوەدەچێت

SNN

وابڕیارە ئەمڕۆ دووشەممە یەکەمین دانیشتنی پەرلەمانی کوردستان بەڕێوەبچێت، کە تیایدا ئەندام پەرلەمانە دەرچووەکانی هەڵبژاردن سوێندی یاسایی دەخۆن.

ئەمڕۆ دووشەممە 2ی کانوونی یەکەم، یەکەمین کۆبوونەوەی خولی شەشەمی پەرلەمانی کوردستان بەڕێوە دەچێت و بەگوێرەی کارنامەکەشی، کۆبوونەوەکەش کاتژمێر 11ی پێشنیوەڕۆ لەلایەن بە تەمەنترین ئەندام پەرلەمانەوە بەڕێوەدەچێت.

کارنامەی یەکەم دانیشتنی پەرلەمانی کوردستان لە چوار بڕگە پێک دێت کە خۆی دەبینێتەوە لە:

یەکەم: کردنەوەی دانیشتنەکە بە چەند ئایەتێک لە قورئانی پیرۆز.

دووەم: یەک خولەک بێدەنگ وەستان بۆ ڕێزلێنان لە گیانی پاکی شەهیدانی کوردستان.

سێیەم: بانگهێشتکردنی بە تەمەنترین کاندیدی ئامادەبوو، لە پالێوراوانی سەرکەوتووی خولی شەشەمی هەڵبژاردنی پەرلەمانی کوردستان لە لایەن سەرۆکی دیوانی پەرلەمان بۆ سوێندخواردن و بەڕێوەبردنی دانیشتنەکە؛ بەپێی حوکمی بڕگەی دووەمی ماددەی 11 و بڕگەی یەکەمی ماددەی 12 لە پەیڕەوی ناوخۆی پەرلەمان.

چوارەم: سەرۆکی یەکەم دانیشتنی خولی شەشەم، کاندیدە هەڵبژێردراوەکان بۆ خولی شەشەمی پەرلەمانی کوردستان – عێراق بانگ دەکات بۆ سوێندخواردنی یاسایی، بەپێی حوکمی بڕگەی دووەمی ماددەی 12 لە پەیڕەوی ناوخۆی پەرلەمانی کوردستان، پاشان دانیشتنەکە لەلایەن سەرۆکی یەکەم دانیشتن بەپێی حوکمی ماددەکانی پەیڕەوی ناوخۆی پەرلەمانی کوردستان بەڕێوە دەبرێت.