هاوار نیوز: دەزگای خێرخوازی بارزانی و میت ئاوارەکانی شەهبا بەرەو عەفرین دەڕفێنن

SNN

هەسەدە رایگەیاند: نزیکەی 15 هەزار کوردی دانیشتووی شەهبا کە بەنیازبوون بۆ رووبکەنە ناوچە پارێزراوەکانی رۆژئاوای کوردستان، لەلایەن گروپە توندڕەوەکانی سەر بە تورکیاوە گەمارۆدراون و بە پێی سەرچاوەیەکیش دەزگایەکی خێرخوازی سەر بە پارتی و میتی تورکیا هەوڵی رفاندنی ئەو ئاوارانە دەدەن بەرەو عەفرین.

ئاژانسی هاوارنیوز (ANHA) بڵاویکردەوە، بە هەزاران کوردی دانیشتووی شەهبا کە بەهۆی پەلاماری چەکدارە توندڕەوەکانی سەر بە تورکیاوە ناچاربوون ماڵ و حاڵی خۆیان جێبهێڵن، لەلایەن ئیدارەی خۆبەڕێوەبەریی باکور و رۆژهەڵاتی سوریا پاسیان بۆ دابینکراوە بۆ ئەوەی بگوازرێنەوە بۆ ناوچە پارێزراوەکانی رۆژئاوا، بەڵام لەلایەن ئەو گروپە توندڕەوانەوە گەمارۆدراون.

ئاماژەی بەوەشکرد، کە دەزگای خێرخوازی بارزانی بە پلانی میت چووەتە لای ئەو ئاوارە گەمارۆدراوانە و بە جۆرێک خۆیان ناساندووە کە لەلایەن ئیدارەی خۆبەڕێوەبەریی باکوور و رۆژهەڵاتی سوریاوەچوون و پێیان وتوون کە دەیانگوازنەوە بۆ ناوچەی پارێزراو، دواتر پاسەکانیان بەرەو عەفرین ئاراستە کردووە کە زیاتر لە شەش ساڵە لەلایەن تورکیا و گروپە توندڕەوەکانەوە داگیرکراوە و دەزگای خێرخوازی بارزانی لەوێ چالاکی هەیە.

هەر بەگوێرەی ئەو هەواڵە دوای ئەوەی ئاوارەکانی شەهبا ناڕەزایەتیان دەربڕیوە لەلایەن میت و چەکدارە توندڕەوەکانەوە رووبەڕووی گرتن و ئەشکەنجەدان بوونەوە.

پێشتریش هێزەکانی سوریای دیموکراتی (هەسەدە) بڵاویانکردبووەوە، نزیکەی 15 هەزار کەس لە ئاوارەکانی شەهبا لەلایەن گروپە توندڕەوەکانی سەر بە تورکیا گەمارۆدراون و رووبەڕووی رفاندن، ئەشکەنجە، برسێتی و تونێتی کراونەتەوە.