“بە گیرفانی خاڵییەوە لەوە زیاتر دەوامان پێناكرێت و بایكۆتمان راگەیاند”

SNN-عەلی حەمە سەعید

بەهۆی دواكەوتن و پێنەدانی مووچەكانیانەوە، بایكۆتی دەوام لە ناوەندەكانی خوێندن لە سنوری پارێزگای هەڵەبجە و سلێمانی و ئیدارەی گەرمیان فراوانتر بووە و مامۆستایان و فەرمانبەران جەخت لەوەدەكەنەوە كە بە گیرفانی خاڵییەوە دەوامیان پێناكرێت. 

ئاری بەكر، یەكێك لە مامۆستایانی سنوری بەڕێوەبەرایەتی گشتی پەروەردەی هەڵەبجە بە SNNی ڕاگەیاند: دۆخی دارایی مامۆستایان و فەرمانبەرانی سنوری پارێزگای هەڵەبجە هاوشێوەی مامۆستایانی ناوچەكانی دیكەی هەرێمی كوردستان لە دۆخێکی زۆر خراپدایە، تا ئەمڕۆ بە هەرجۆرێك بووە توانیومانە درێژە بەدەوام بدەین لەناوەندەكانی خوێندن بەڵام لەوە زیاترمان پێناكرێت بایكۆتمان ڕاگەیاند.

ئاماژەی بەوەشكرد، ئەم بایكۆتە ناچارییە و ناتوانین بە گیرفانی خاڵییەوە هاتووچۆبكەین بۆ سەركارەكانمان، لەكاتێكدا دوومانگە مووچەمان وەرنەگرتووە و قەرزاری دووكان و بازاڕ و تەنانە ئەو شۆفێرەشین كە ئەم ماوەیە هاتوچۆی پێكردووین بۆ سەر كارەكانمان لەدەرەوەی هەڵەبجە، بۆیە تا ئەم دۆخە كۆتایی نەیەت و مووچەكانمان دابەشنەكرێن ناتوانین دەوام بكەین.

لەلایەكی دیكەوە هەر ئەمڕۆ لە سنوری ئیدارەی گەرمیان، بەشێكی زۆری ناوەندەكانی خوێندن دەستیان بە بایكۆتی دەوام كردووە ئەوە سەرەڕای ئەوەی بەشێك لە فەرمانبەرانی دامودەزگا حكومییەكان بەهەمان شێوە بایكۆتیان ڕاگەیاندووە ئەوەش بەهۆی دابەشنەكردنی مووچەكانیان.

هەر ئەمڕۆ بەڕێوەبەرایەتی هاتوچۆی پارێزگای سلێمانی و بەڕێوەبەرایەتی ئاوی سلێمانیش بایكۆتی كارەكانیان راگەیاند ئەوە سەرەڕای ئەوەی لە بەشێكی زۆری قوتابخانەكانی سلێمانی و گەرمیان مامۆستایان بایكۆتی هۆڵەكانی خوێندنیان كردووە و لە بەشێكی زۆری فەرمانگەكان بایكۆت كراوە و مامەڵەی هاوڵاتییان بەڕێ ناكرێت.