وەزارەتی دارایی: تیمی تەکنیکی وەزارەتی دارایی کێشەی گواستنەوەی پارەی چارەسەر کرد

SNN-

وەزارەتی دارایی حکومەتی هەرێمی کوردستان راگەیەندراوێکی لەبارەی مووچەوە بڵاوکردەوە و رایگەیاند، تیمی تەکنیکی وەزارەتمان کێشەی گواستنەوەی پارەیان لە بەغداوە چارەسەر کرد.

وەزارەتی دارایی و ئابوری حکومەتی هەرێمی کوردستان دەڵێت:” دوای سەردانی تیمی تەکنیکی وەزارەتی دارایی و ئابوری هەرێمی کوردستان بۆ بەغداد و بردنی لیستی مووچەی مانگی کانونی یەکەم بۆ وەزارەتی دارایی حکومەتی فیدراڵ و دوای هەوڵە بەردەوامەکانیان لە گەڵ فەرمانگە پەیوەندیدارەکانی وەزارەتی دارایی عێراق، تیمی تەکنیکی وەزارەتی دارایی هەرێمی کوردستان سەرکەوتوانە توانیان کێشەی گواستنەوەی پارە لە تەرخانکراوەکانی پشکی هەرێم بۆ زیادکردنی بڕی تەرخانکراو بۆ مووچە چارەسەر بکەن و ڕۆژی دووشەممە ( 9-12-2024 ) لەلایەن بەڕێوبەرایەتی گشتی بودجەی وەزارەتی دارایی عێراقەوە فرمانی گواستنەوەکە دەرچوو.

لە راگەیەندراوەکەدا هاتووە کە تیمەکەیان لەسەر هێڵە بەمەبەستی بەدواداچوون بۆ جێبەجێکردنی بڕیارەکەو گەیشتنی پارەکە بەمەبەستی چارەسەرکردن و پڕکردنەوەی ئەو کورتهێنانەی بۆ مووچەی هەرێم لەلایەن وەزارەتی دارایی عێراقەوە دروست کراوە.