کاروان یاروەیس:سورین لەسەر تەوتینكردنی مووچەی فەرمانبەران
SNN-عەلی حەمە سەعید
بڕیاردەری فراكسیۆنی یەكێتی لە پەرلەمانی عێراق جەخت لەوەدەكاتەوە 150 واژۆی سەرۆك فراكسیۆن و پەرلەمانتارانی فراكسیۆنە جیاوازەكانمان جگە لە فراكسیۆنی پارتی، ڕادەستی سەرۆك وەزیرانی عێراق كردووە بۆ ئەوەی تەوتین جێبەجێبكرێت، چونكە ئەگەر تەوتین نەكرێت گرفتی مووچە قوڵتر دەبێتەوە.
كاروان یاروەیس، بڕیاردەری فراكسیۆنی یەكێتی لە پەرلەمانی عێراق بە SNNی ڕاگەیاند: ئێمە لە فراكسیۆنی یەكێتی سوورین لەسەر جێبەجێ كردنی بڕیاری دادگای فیدڕاڵی لەبارەی تەوتینەوە، بۆ ئەو مەبەستەش توانیومانە 150 واژۆی سەرۆك فراكسیۆن و پەرلەمانتارانی عێراق جگە لە فراكسیۆنی پارتی كۆبكەینەوە كە پشتگیری لە تەوتین دەكەن و ڕادەستی سەرۆكوەزیرانی عێراقمان كردووە ئەویش بە نوسراو ڕەوانەی وەزارەتی دارایی عێراقی كردووە بۆ ئەوەی ڕێوشوێنی تەوتین بگرنەبەر.
ئاماژەی بەوەشكرد، پابەند نەبوون بە بڕیارەكەی دادگای فیدراڵی لەبارەی چارەسەر نەكردنی كێشەی ڕادەست نەكردنی داهاتی نانەوتی و تەوتین وا دەكەن كێشەی مووچە لەمە قووڵتر بێتەوە، ڕەنگە تا ڕادەی ڕاوەستاندنی تەمویلی مووچەش بڕوات و ئەو كاتە چارەسەرەكان زیاتر بە بنبەست دەگەن.
بڕیاردەری فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، كاتی ئەوە هاتووە حكومەتی عێراقی بڕیاری ڕاشكاو و ڕوونی خۆی بدات لەبارەی تەوتینەوە، چونكە ناكرێت لەمە زیاتر كات بەفیڕۆ بدرێت و فەرمانبەران و مووچەخۆرانی هەرێمیش دوومانگە مووچەیان وەرنەگرتووە و دیاریش نییە چارەنووسی مووچە لە ساڵی نوێ بە كوێ دەگات.
