سەرۆكی كۆمەڵەی كێڵگە پەلەوەرییەكان نرخی مریشك دادەبەزێت

SNN-عەلی حەمەسەعید

سەرۆكی كۆمەڵەی كیڵگە پەلەوەرییەكان ئاماژە بەوەدەكات، لەگەڵ ئەوەی كە حكومەتی هەرێم هیچ هاوكاری و كارئاسانییەك بۆ خاوەن كێڵگە پەلەوەرییەكان ناكات بەڵام بەردەوام خاوەن كێڵگەكان لە زەرەردان، هاوكات بەراورد بە هەفتەی ڕابردووش نرخی مریشكی زیندوو دابەزیوە.

نازم عەبدوڵا، سەرۆكی كۆمەڵەی كێڵگە پەلەوەرییەكانی لە سنوری پاریزگای سلێمانی و گەرمیان بە SNNی ڕاگەیاند: بەردەوام ئەو گرفتەمان هەبووە كە حكومەتی هەرێم بەدەم داواكاری خاوەن كیڵگەپەلەوەرییەكانەوە نەهاتووە و بگرە هەندێك جاریش گرفتی بۆ دروستكردوین، هاوكات ئامادەنییە غاز و گاز بە نرخی پاڵپشتیكراو بۆ كێڵگەپەلەوەرییەكان دابین بكات.

ئاماژەی بەوەشكرد،نرخی یەك كیلۆ مریشك لە كێڵگەپەلەوەرییەكاندا بە دوو هەزار و 500 دینار دەفرۆشرێت و بە بەراورد بە دوو هەفتە لەمەوبەر نرخەكەی دابەزیوە و دوو هەفتە لەمەوبەر نرخی یەك كیلۆ مریشك نزیكی سێ‌ هەزار دیناربووە و بەمەش نرخەكەی دابەزیوە.

سەرۆكی كۆمەڵەی كێڵگەپەلەوەرییەكان ئەوەشی خستەڕوو، نرخی یەك كلیۆ مریشك لەسەر خاوەنی كێڵگە پەلەوەرییەكان دوو هەزار و 400 دینار دەكەوێت، بەڵام زۆربەی كات خاوەنی كێڵگە پەلەوەرییەكان لەو نرخە كەمتر دەیفرۆشنەوە بەهاووڵاتیان جگە لەوەی قازانج ناكەن بەڵكوو زۆرجاریش زەرەر دەكەن.