“تا ئەوكاتەی لە بەغداوە گەرەنتی هەرسێ مووچەی كۆتایی ئەمساڵ نەكرێت مووچە دابەش نەکەن”
مەسرور بارزانی سەرۆکی حکومەتی هەرێمی کوردستان
SNN-عەلی حەسەعید
هەرچەندە وابڕیاربوو كە ئەمڕۆ لیستی مووچەی مانگی 10ی فەرمانبەرانی هەرێم بلاو بكرێتەوە و سبەیی پێنج شەممەش دەستبكرێت بەدابەشكردنی مووچە، بەڵام لە كۆتا ساتەكانی كۆبوونەوەكەی ئەنجومەنی وەزیران لەسەر داوای سەرۆكی حكومەت بڕیاردراوە دابەشكردنی مووچە ڕابرگرن.
بەگوێرەی ئەو زانیاریانەی كە لەسەرچاوەیەكی ئەنجومەنی وەزیرانم دەستی كەوتووە ئەوەخراوەتەڕوو، لە كۆبوونەوەی ئەمڕۆی ئەنجومەنی وەزیران هەموولایەك هاوڕابوون لەسەر ئەوەی ئەمڕۆ لیستی مووچەی مانگی 10ی فەرمانبەران بڵاو بكرێتەوە و سبەی پینج شەممەش دەستبكرێت بەدابەشكردنی مووچە بەلام لەكۆتا ساتەكانی دانیشتنەكەی ئەنجومەنی وەزیران و بەبڕیاری سەرۆكی حكومەت داوا لە وەزارەتی دارایی كرا لیستی مووچە بلاو نەكرێتەوە.
ئاماژەی بەوەشكرد، هۆكاری ئەو بڕیارە بۆ ئەوە دەگەڕێتەوە كە سەرۆكی حكومەت بە وەزیرەكانی ڕاگەیاندووە بەتایبەت وەزیری دارایی تا ئەوكاتەی گەرەنتی هەرسێ مووچەی كۆتایی ئەمساڵ نەكرێت لەڕووی دابینكردنی كورتهێنان دەستنەكرێت بەدابەشكردنی مووچە و لیستی مووچە بڵاوو نەكەنەوە.
SNNئەوەشی زانیوە كە ئەنجومەنی وەزیرانی هەرێم داوایان لە ئەنجومەنی وەزیرانی عێراق كردووە لە كۆبوونەوەی سبەی خۆیاندا بابەتی كورتهێنانی مووچەی فەرمانبەرانی هەرێم چارەسەر بكەن ئەگەر سبەینێ ئەو بابەتە لە ئەنجومەنی وەزیرانی عێراقەوە بڕیاری لەبارەوە درا، ئەوا بەدڵنیاییەوە یان سبەی یاخود لە هەفتەی داهاتووەوە دەستدەكرێت بەدابەشكردنی مووچە.
