وەزارەتی دارایی: جوهدی تەواو دەکەین کە هیچ مووچەیەکی ئەمساڵ نەفەوتێت

SNN-

وتەبێژی وەزارەتی دارایی و ئابوری حکومەتی هەرێمی کوردستان رایگەیاند:پەیوەندی باشمان لەگە وەزیری دارایی عێراق و ستافەکانی هەیە لە بەغدا و زۆربەی کێشە تەکنیکییەکانمان چارەسەرکردووە و وامان کردووە هیچ بیانوویەک بەدەست بەغدا نەمێنێت

هونەر جەمال، وتەبێژی وەزارەتی دارایی و ئابوری حکومەتی هەرێمی کوردستان لە کۆنفرانسێکی رۆژنامەوانیدا رایگەیاند:”ئێمە ئێستا پەیوەندییەکی زۆر باشمان لەگەڵ وەزیری دارایی عێراق و ستافەکەی هەیە، بەبەردەوامی تیمەکانمان لەسەر هێڵن، هەفتانە یان مانگانە تیمەکانمان چەند جارێک دەچنە بەغدا.”

وتیشی:”مانگی 10، تیمی تەکنیکیی ئێمە 4 هەفتە لەوێ بووە و، بەشی زۆری کێشە تەکنیکییەکانیان چارەسەر کردووە، ئێستاش دەتوانین بڵێین هیچ بیانوویەکی وا بەدەست وەزارەتی دارایی عێراقەوە نەماوە کە مانگی 7 نزیکەی 600 ملیار دیناری لە ئێمە بڕی، بەبیانووی هەندێک کێشە، بەڵام ئێستا هەموو بابەتەکان چارەسەر کراون.”

جەختیشیکردەوە کە تەواوى هەواڵەکانى پەیوەست بە وەزارەتى دارایی دەبێت لە وەزارەتەکەوە وەربگیرێت و پشت بە سەرچاوەى لاوەکى نەبەسترێت و داواشى کرد راگەیاندنەکان بەرپرسانەتر مامەڵە لەگەڵ دۆخەکەدا بکەن.

هەروەها رێباز عەباس، راوێژکاری وەزارەتی دارایی و ئەندامی تیمى تەکنیکى وەزارەتى دارایی هەرێم دەڵێت: کۆمپیوتەرەکانى بەغداد ئەوەندە کۆن بو سیدییەکانى ئێمەى نەدەخوێندەوە کە لیستى موچەى تێدابوو، بە پێنج مانگ رەزامەندیان بۆ کڕینى سێ لاپتۆپ وەرگرت و سیدییەکانیان خوێندەوە”.

ئاماژەی بەوەشکرد، لیستى موچەى مانگى 11 وردبینیکراوە ئامادەیە بۆ تەمویل و 430 ملیار دینارە گواستراوەکەش ئامادەیە بۆ تەمویل و بەردەوام لەخەتین بۆ دابینکردنى مافى هاووڵاتییانى هەرێم.

ئەوە لەکاتێکدایە لە کۆتایی ساڵ نزیکدەبینەوە و تاوەکو ئێستا مووچەخۆرانی هەرێمی کوردستان مووچەی مانگەکانی (12,11,10)-یان وەرنەگرتووە، دوێنێش لە کۆبوونەوەی ئەنجوومەنی وەزیرانی حکومەتی هەرێمی کوردستان، رایگەیاند: ئەگەر بەغدا پارەی دیکە بنێرێت دەست بە دابەشکردنی مووچە دەکەن، لەکاتێکدا ئێستا بڕی یەك ترلیۆن و 191 ملیار دینار لەبەردەست حکومەتدایە.