“ئەوەی حكومەتی هەرێم دەیکات یاریكردنە بە قووت و ژیانی یەك ملیۆن مووچەخۆر”

SNN-عەلی حەمە سەعید

مامۆستایان و فەرمانبەران لە سنووری سلێمانی و هەڵەبجە جەخت لەوەدەكەنەوە كە بە بێگوێدانە ئەوەی كە ژیان و گوزەرانی هاووڵاتیان لەو پەڕی خراپیدایە بەلام حكومەتی هەرێم و وەزارەتی دارایی یاری بە هەست و بە قووت و ژیانی یەك ملیۆن هاووڵاتی ئەم هەرێمە دەكەن.

محەمەد عەبدوڵا، بەڕێوەبەرییەكێك لە قوتابخانەكانی سنووری بەڕێوەبەرایەتی گشتی پەروەردەی هەڵەبجە بە SNNی ڕاگەیاند: ئەوەی لە ئێستادا دەگوزەرێت ئەنجامی ئەو سیاسەتە شكستخواردووەی سەرۆكی حكومەتە كە لەسەرەتای كابینەكەیەوە گرتوویەتییە بەر بەرامبەر بەهاووڵاتیان بەگشتی و فەرمانبەران و مووچەخۆران بەتایبەت، لەكاتێكدا بۆ سێ‌ مانگ دەڕوات فەرمانبەران مووچەیان وەرنەگرتووە بەڵام سەرۆكی حكومەت لە قەتەر و وڵاتانی كەندا خۆی و كوڕەكەی لەگەڵ مەلیك و شا و بەرپرسانی وڵاتانی كەنداو نمایشدەكات.

ئاماژەی بەوەشكرد، ئەو خۆنمایشكردنەی سەرۆكی حكومەت و هەروەها ئەو بێباكییەی وەزارەتی دارایی كە بەفەرمانی سەرۆكی حكومەت كاردەكات ئەو پەڕی یاركردنە بە هەستی فەرمانبەران و قوتی ژیانی زیاتر لە یەك ملیۆن مووچەخۆی ئەم هەرێمە، لەكاتێكدا ناوەندەكانی خوێندن لە سلێمانی و هەڵەبجە بایكۆتی خوێندنیان كردووە بەڵام وەك ئەوەی هیچ ڕووی نەدابێت خۆیان ناكەن بە خاوەنی ئەم هاووڵاتیانەی كە سێ‌ مانگە مووچەیان وەرنەگرتووە.

بەگوێرەی بەدواداچوونەكانی SNNبەهۆی دابەشنەكردنی مووچەوە بایكۆت لە داموودەزگا حكومییەكان و هەروەها ناوەندەكانی خویندن بەردەوامی هەیە ئەوەش لەكاتێكدا كە سەرەڕای ئەوەی حكومەتی عێراقی بڕی زیاتر لە یەك تریلیۆن دیناریان ڕەوانەی هەرێم كردووە بەڵام حكومەتی هەرێم ئامادە نییە مووچە دابەشبكات.