“سبەینێ دەست بە دابەشکردنی مووچەی مانگی 10 دەکرێت”

SNN

وەزارەتیی دارایی و ئابوری حکومەتی هەرێم دوێنێ رایگەیاند، کە سێشەممە 17ی کانوونی یەکەم دەست بە دابەشکردنی مووچەی مانگی 10 دەکەن، هاوکات لەگەڵ هاتنی تەمویلی مانگی 11 و 12 لەلایەن بەغداوە لیستی مووچەی ئەو دوو مانگەش رادەگەیەنن و دابەشی دەکەن.

بەگوێرەی راگەیەنراوەکەی وەزارەتیی دارایی و ئابوری هەرێم، سبەینێ سێشەممە دەست بە دابەشکردنی مووچەی مانگی 10 دەکرێت، ئەمە لە کاتێکدایە  وەزارەتی دارایی عێراق زیاتر لە 15 رۆژە، 763 ملیار دیناری بۆ مووچەی مانگی 10 خستۆتە سەر هەژماری دارایی هەرێم، بەڵام بەبیانوی كورتهێنانەوە مووچەی مانگی 10ی دابەشنەدەكرد، ئەمەش بایكۆتی خوێندنی لەبەشێك لە فەرمانگەكانی پارێزگای سلێمانی لێكەوتۆ‌تەوە.

هاوکات تاکو ئێستاش لیستی مووچەی مانگی 10 رانەگەیەنراوە، بەپێی زانیارییەکانی کەناڵی رووداو لیستی مووچەی مانگی 10 ئەمڕۆ رادەگەیەنرێت و هاوشێوەی لیستی مووچەی مانگی پێشوو دەبێت، یەکەم شوێن خانەنشینانی سەربازی و مەدەنی مووچەکانیان وەردەگرن.

سەبارەت بە هاوتابوونی مووچەی خانەنشینانی سەربازی، شێخ عەزیز عەلی، بەڕێوەبەری خانەنشینیی پێشمەرگە لە سلێمانی رایگەیاند، “مووچەی مانگی 10 هاوشێوەی مانگەکانی رابردوو بەگوێرەی یاسا کۆنەکە دەبێت و هاوتا نەکراوە.”