نوێترین زانیاریی لەبارەی دابەشكردنی مووچەی خانەنشینانی سەربازی بە هاوتاكراوی

SNN-عەلی حەمە سەعید

وابڕیارە سبەی سێشەممە دەستبكرێت بەدابەشكردنی مووچەی مانگی 10ی فەرمانبەران و خانەنشینانی هەرێم، بەوتەی جێگری بەڕێوەبەری خانەنشینی هێزەكانی یەکەی 70 ی پێشمەرگە، مووچەی خانەشینی شارستانی بەهاوتاكراوی دابەشدەكرێت بەڵام بۆ ئەم مانگەش خانەنشینانی سەربازی مووچەكانیان هاوتانەكراوە.

فەتحوڵا عومەر، جێگری بەڕێوەبەری خانەنشینیی هێزەكانی یەكە 70ی پێشمەرگە بە SNNی ڕاگەیاند: ئەو لیستی مووچەیەی كە بۆ مانگی 10 ڕەوانەی وەزارەتی دارایی كراوە بۆ خانەنشینانی سەربازی هەر بەگوێرەی سیستەمە كۆنەكە ئامادەكراوە و بەهاوتاكراوی ئامادەنەكراوە و ڕەوانەی وەزارەتی دارایی هەرێم نەكراوە، بۆیە بۆ ئەم مانگەش خانەنشینانی سەربازی بەهاوتاكراوی مووچەكانیان وەرناگرن.

ئاماژەی بەوەشكرد، ئێمە لیستەكانی مووچەی خانەنشینیمان بەپێی لیستە كۆنەكە بۆ ئەمساڵ ئامادەكردووە و ناردوومانەتە وەزارەتی دارایی، هاوكات تا ئێستا هیچ هەوڵێكی نوێ بۆ هاوتاكردنی مووچەی خانەنشینی سەربازی نییە بۆیە مووچەی مانگی 10ی خانەنشینانی سەربازی هاوشێوەی مانگەكانی رابردوو بەگوێرەی یاسا كۆنەكە خەرجدەكرێت.

وتەكانی ئەو بەرپرسەی خانەنشینی هێزەكانی یەكەی 70 لەكاتێكدایە كە لە مانگی حەوتی ئەم ساڵەوە، بۆ یەكەمجار خانەنشینانی شارستانیی هەرێمی كوردستان بەگوێرەی یاسای خانەنشینیی یەكگرتووی عێراق، بەهاوتاكراوی مووچەیان وەرگرت، بەڵام هاوتاكردنەكە تا ئێستاش خانەنشینانی سەربازیی نەگرتووەتەوە.