ئیسرائیل: تورکیا پشتیوانی ئەو هێزە جیهادییانە دەکات کە دژی کورد لە سوریا چالاکی دەکەن

SNN

وەزارەتی دەرەوەی ئیسرائیل بە توندی لێدوانەکانی کاربەدەستانی تورکیا لەبارەی جموجۆڵەکانی ئیسرائیل لە سوریا رەتدەکاتەوە و لەو پەیوەندییەدا ئاماژە بەوەدەکات کە تورکیا دوایین وڵاتە کە دەتوانێت باسی داگیرکەری لە سوریا بکات، باس لە هێرشەکانی ئەنقەرە بۆ سەر کوردانی رۆژئاواش دەدات و جەخت دەکاتەوە کە ئەو پەلامارانە هیچ پاساوێک هەڵناگرن.

لە راگەیەندراوێکدا وەزارەتی دەرەوەی ئیسرائیل باسی لەوەکردووە، تورکیا لە ساڵانی 2016، 2018 و 2019 لە رێگەی بریکارەکانیەوە رووبەرێکی فراوان لە خاکی سوریای داگیرکردووە و لەو ناوچانەدا دراوی تورکی بەکاردەهێنرێت و لقی بانکی تورکی و خزمەتگوزاری پۆستە کاریان کردووە.

جگە لەوەش سوپای تورکیا ژێرخانی ناوچەی خۆبەڕێوەبەری باکوور و ڕۆژهەڵاتی سوریا بە بەکارهێنانی فڕۆکە و فڕۆکەی بێفڕۆکەوان بۆردومان دەکات.

هەروەک راشیگەیاندووە، تورکیا پشتیوانی ئەو هێزە جیهادییانە دەکات کە دژی کورد لە سوریا چالاکی دەکەن.

جەختیشی کردووەتەوە، دوا وڵات کە دەتوانێت باسی داگیرکاری لە سوریا بکات تورکیایە، چونکە 15%ی خاکی سوریا لەژێر کۆنترۆڵی بریکارەکاندا لەژێر چاودێری ئەو وڵاتەدا کاردەکەن. هیچ پاساوێک بۆ بەردەوامیی دەستدرێژی و توندوتیژیی تورکیا لە دژی کورد لە سوریا نییە!