مەزهەر محەمەد: عێراق لە مەترسی قەرزە دەرەکییەکان رزگاری بووە

SNN-

ڕاوێژکاری دارایی سەرۆکوەزیرانی عێراق ڕایگەیاند، عێراق تەنها 9 ملیار دۆلار قەرزی دەرەکی لایە و ئێستا مەترسی لەسەر نەماوە.

ئەمڕۆ چوارشەممە، مەزهەر محەمەد، ڕاوێژکاری دارایی محەمەد شیاع سودانی سەرۆکوەزیرانی عێراق ڕایگەیاند، عێراق لە ژێر باری گەورەی قەرزە دەرەکییەکان ڕزگاری بووە و لە وڵاتێکی قەرزدارەوە بووە بە قەرز بەخش بە وڵاتانی دیکە.

وتیشی:”ئەو قەرزەی لەسەر عێراق ماوە لە 9 ملیار دۆلار کەمترە و لە ئێستاوە تا ساڵی 2028 دەدرێتەوە”.

ڕۆژنامەی سەباح بڵاویکردەوە کە سوودانی چاکسازی لە سیستمی دارایی عێراقدا کردبووە کاری لە پێشینەی حکومەتەکەی و ئەوەش لە ماوەی دوو ساڵی ڕابردوودا دەرەنجامی گرنگی لێکەوتەوە.

مەزهەر محەمەد ڕاشیگەیاند، ئەو پارەیەی کە بۆ دانەوەی قەرزەکە تەرخانکراوە لە 5٪ی کۆی داهاتی ناوخۆ تێپەڕ ناکات.