وەزیری دەرەوەی فەرەنسا: پێویستە هاوبەشە کوردەکانمان لە سوریا بپارێزین

SNN

وەزیری دەرەوەی فەرەنسا پشتیوانی وڵاتەکەی بۆ کوردەکانی رۆژئاوای کوردستان دەردەبڕێت و جەختیش لە پێویستی دەستەبەرکردنی مافەکانیان دەکاتەوە.

ژان نۆئێل بارۆت، وەزیری دەرەوەی فەڕەنسا ڕایگەیاند، پێویستە هاوبەشە کوردەکانمان لە باکوری ڕۆژهەڵاتی سوریا بپارێزرێن و جەختیشی لەوە کردەوە کە “دەبێت مافەکانی کورد لە سوریا دەستەبەر بکرێت”.

هەروەک وتیشی: پێویستە هەسەدە بکرێتە بەشێک لە پرۆسەی گواستنەوەی سیاسی لە سوریا.

دەربارەی هێرشەکانی تورکیا و گروپە توندڕەوەکانیش ئاماژەی بەوەکرد، کاردەکەین لەسەر هێنانەکایەی رێککەوتن لە نێوان تورکیا و کوردەکان لە باکووری سوریا و لەو چوارچێوەشدا باسی لەوەکرد، کە شەڕ لە منبج و کۆبانێ دەبێت دەستبەجێ رابگیرێت.

وەزیری دەرەوەی فەرەنسا لە هەمان کاتدا کوردەکانی بە یەکێک لە پایە و کۆڵەکە گرنگەکانی شەڕی دژ بە داع*ش ناوبرد.

ژان نۆئێل بارۆت سەبارەت بە حکومەتی راگوزەری سوریا و تێڕوانینی وڵاتەکەی بۆ ئەو حکومەتەش وتی: لەسەر بنەمای لێدوان و بەڵێنەکانیان هەڵسەنگاندن بۆ بەرپرسان و حکومەتی نوێی راگوزەر لە سوریا ناکەن، بەڵکوو لە سەر کردارەکانیان و بە تێپەڕبوونی کات هەڵسەنگاندنیان بۆدەکەن.

نۆئێل بارۆ ئاماژەی بەوەدا کە “هەڵگرتنی سزاکان و هاوکارییەکانی ئاوەدانکردنەوەی سوریا دەبێت بە مەرجی پابەندبوونی سیاسی و ئەمنی ڕوون بێت”.