فڕۆکەیەکی هێزەکانی ئەمەریکا لە دەریای سوور کەوتە خوارەوە

SNN

ئەمڕۆ یەکشەممە، 22ـی کانوونی یەکەم سوپای ئەمەریکا، ڕایگەیاند ” فڕۆکەیەکی F-A18ی هێزی دەریایی ئەمەریکا لە ئاسمانی دەریای سوور لە ڕووداوێکدا خراوەتە خوارەوە.”

بەپێی هەواڵێکی ئاژانسی ئەسۆشێتد پرێس، هەردوو فڕۆکەوانەکەی ڕزگارکراون، بەڵام یەکێکیان برینێکی سووکی پێ گەیشتووە.

لە بەیاننامەکەی فەرماندەیی ناوەندیدا هاتووە؛ کەشتییە جەنگییەکەی یو ئێس ئێس گێتیسبێرگ، بەشێکە لە گرووپی فڕۆکە هەڵگری یو ئێس ئێس هاری ئێس ترومان، بە هەڵە تەقەی لە فڕۆکەیەکیF/A18 کردووە، کە لە کەشتی فڕۆکەهەڵگری هاری ئێس ترومانەوە دەفڕی.

هێزەکانی ئەمەریکا لە کاتی ڕووداوەکەدا هێرشی ئاسمانییان بۆ سەر حووسییەکانی یەمەن کردبوو و بەیاننامەی فەرماندەیی ناوەندیی ئەمەریکاش وردەکاریی زیاتری سەبارەت بە سروشتی ئەرکەکە نەخستەڕوو.

بەگوێرەی ئەوەی فەرماندەیی ناوەندیی ئەمەریکا (CENTCOM) بڵاوی کردووەتەوە، سوپای ئەمەریکا هێرشی کردووەتە سەر حووسییەکان لە سەنعا، لەوانەش شوێنی هەڵگرتنی مووشەک و دامەزراوەی فەرماندەیی و کۆنترۆڵکردن.

فەرماندەیی ناوەندیی ئەمەریکا، سێنتکۆم، لە بەیاننامەیەکدا ئاشکرای کرد، لە میانی ئۆپەراسیۆنەکەدا هێزەکانی ئەمەریکا چەندان فڕۆکەی بێفڕۆکەوانی هێرشبەری حووسییان لە ئاسمانی دەریای سووردا خستووەتە خوارەوە، جگە لە موشەکێکی دژە کەشتی جۆری کروز.