سەرۆکی ئەڵمانیا پەرلەمانی وڵاتەکەی هەڵوەشاندەوە
SNN
سەرۆکی ئەڵمانیا پەرلەمانی وڵاتەکەی هەڵوەشاندەوە و مانگی شوباتی 2025ی بۆ بەڕێوەچوونی هەڵبژاردنی پێشوەختەی پەرلەمان دیاریکرد.
ئەمڕۆ هەینی، 27ی کانوونی یەکەم، فرانک واڵتەر شتاینمایەر، سەرۆکی ئەڵمانیا لە وتارێکدا رایگەیاند، “بیستەم خولی هەڵبژاردنی پەرلەمان لە 23ی شوباتی داهاتوو دەکرێت .”
هۆکاری هەڵوەشاندنەوەی پەرلەمانی ئەڵمانیا لەلایەن سەرۆکی وڵاتەکەوە دوای ئەوە دێت، کە رۆژی 16ی ئەم مانگە ئۆلاف شۆڵتز، راوێژکاری ئەڵمانیا شکستیهێنا لەوەی زۆرینەی پەرلەمانی بۆ پاڵپشتیکردنی حکومەتی وڵاتەکەی کۆبکاتەوە.
میدیای ئەڵمانیا لەبارەی بڕیارەکەوە بڵاویکردەوە، سەرکردەکانی پارتی سۆشیال دیموکرات و هاوپەیمانیەتیی کریستیان دیموکراتەکان رەزامەندیی خۆیان دەربڕیوە.
هاوکات، لە ئێستادا پارتە سەرەکییەکانی ئەڵمانیا رەتیان کردووەتەوە لەگەڵ پارتی دەسەڵاتدار کاربکەن و بەشێکیان لە ئەدای کارکردنی ئۆلاف شۆڵدز، راوێژکاری وڵاتەکە ناڕازین.
