وادەی هاوتاكردنی مووچەی سەرجەم خانەنشینانی هەرێم لەگەڵ بەغدا دیاریكرا

SNN-عەلی حەمە سەعید

وتەبێژی یەكێتی خانەنشینانی هەرێم ئاماژەبەوەدەكات لە مانگی یەكی ئەمساڵ مووچەی سەرجەم خانەنشینانی هەرێم لەگەڵ خانەنشینانی عێراق هاوتا دەكرێت، بەڵام هێشتا نەگەیشتوونەتە ڕیككەوتنی كۆتایی لەسەر تەمەنی خانەنشینی لەنیوان هەولێر و بەغدا.

سادق عوسمان، وتەبێژی یەكێتی خانەنشینانی كوردستان، بە SNNی ڕاگەیاند: ئەو فەرمانبەرانەی كە لە دوای ساڵی 2014 خانەنشین بوون مووچەیان هاوتا كراوە، و بڕیارە لە مانگی یەكی ئەمساڵیش  مووچەی ئەو خانەنشینانەش هاوتابكرێن كە تا ئێستا هاوتای عێراق نەكراون، هاوكات ئەوخانەنشینانەی پێش 2014خانەنشین بوون، هێشتا بڕوانامەیان بۆ هەژمار نەكراوە، جگە لەو 100 هەزارەی بژێوییەش كە زیادكراوە.

ئاماژەی بەوەشكرد، ئەو لیژنەیەی لەنێوان هەرێم و بوغدا پێكهێنراوە بۆ هاوتاكردنی تەمەنی خانەنشینی، هێشتا نەگەیشتوونەتە ڕیككەوتنی كۆتایی لەسەر تەمەنی خانەنشینی، ئەگەر بڕیاردرا فەرمانبەر لە 60 ساڵیدا خانەنشین بن، ئەوا گرفت دروستدەكات و دەبێت لە هەرێم لەیەك كاتدا چوار قۆناغی تەمەن خانەنشین بكرێن، ئەوانیش 60 و 61 و 62 و 63ساڵین.

وتەبێژی یەكێتی خانەنشینانی كوردستان، ئەوەشی خستەڕوو،داوا لە هەموو بەڕێوبەرایەتییەكانی خانەنشینی هەرێم كراوە فایل بۆسەرجەم ئەو فەرمانبەرانە بكەنەوە كە تەمەنیان بۆتە 60 ساڵ، چونكە تەمەنی خانەنشینی لە بەغدا 60 ساڵە، بەو بڕیارە كەسانێكی زۆری خاوەن ئەزموون و بڕوانامە ناچار دەبن خانەنشین بن كە پێویستن، جگە لەوە دەبێ پاداشتی خانەشنینیشان پێ بدرێت، ئەویش دەكاتە پارەیەكی زۆر.