فراكسیۆنی یەكێتی لەهەوڵی دابینكردنی نەوتی سپییە بۆ هاووڵاتیانی هەرێم

SNN-عەلی حەمە سەعید

بە مەبەستی دابینكردنی نەوتی سپی بۆ هاووڵاتیانی هەرێم و هاوكات زیادكردنی بڕی ئەو 50 هەزار لیترە نەوتەی كە بڕیاری لەبارەوە دراوە بۆ سنووری پارێزگای هەڵەبجە ڕەوانە بكرێت، پەرلەمانتارانی فراكسیۆنی یەكێتی لەئەنجومەنی نوێنەرانی عیراق لەهەوڵی دابینكردنی نەوتی سپین بۆهاووڵاتیان.

چرۆ حەمەشەریف، ئەندامی ئەنجومەنی نوێنەرانی عێراق لە فراكسیۆنی یەكێتی بەSNNی ڕاگەیاند: لە چوارچێوەی هەوڵەكانمان بۆ دابینكردنی نەوتی سپی بۆ هاووڵاتیانی هەرێمی كوردستان بە گشتی و سنوری پارێزگای هەڵەبجە بە تایبەت، وەك فراكسیۆنی یەكێتی لەهەوڵەكانمان بەردەوامین و لەو چوارچێوەیەشدا ئەمڕۆ لەگەڵ بریكاری وەزیری نەوتی عێراق كۆبووینەوە و بڕیاری پێویست لەوبارەیەوە درا.

ئاماژەی بەوەشكرد، بەدواداچوونمان بۆ گەیشتنی بڕی 50 ملیۆن لیتر نەوت بۆ هەرێمی كوردستان كردووە كە بڕیارە لە چەند ڕۆژی داهاتوودا ئەو بڕە نەوتە بگاتە هەرێمی كوردستان، هاوكات داواشمان كرد هەوڵی تەواو بدرێت بەشە نەوتی سنوری پارێزگای هەڵەبجە و پێنجوێن زیاد بكرێت بە هۆی ئەوەی ناوچەیەكی سارد و شاخاوییە.

ئەو پەرلەمانتارەی فراكسیۆنی یەكێتی ئەوەشی خستەڕوو، بریكاری وەزارەتی نەوتی عێراق دڵنیایی كردینەوە كە لە ماوەیەكی نزیكدا بڕی ئەو 50 ملیۆن لیتر نەوتە دەگاتە هەرێمی كوردستان و لە پارێزگای هەڵەبجەوە دەست بە دابەشكردنی دەكرێت كە بۆ هەر لیترێك بڕی 250 دینار وەردەگیرێت.