سکاڵا لەسەر سەرۆکی سێ حزبی هەرێم تۆمارکرا
عەلی حەمەسەعید-SNN
بەتۆمەتی ئەوەی بوونە هۆکار بۆ دەستێوەردانی وڵاتانی دیکە لە کاروباری ناوخۆیی ھەرێمی کوردستان و عێراق بەدەر لە ڕێکارە پرۆتۆکۆڵی و دیپلۆماسیەکان، ئەندامێکی پێشووی ئەنجومەنی کۆمیسیاران سکاڵای یاسایی لەسەر سەرۆکی سێ حزبی هەرێم تۆمارکرد.
سەعید كاكەیی ئەندامی پێشووتری ئەنجومەنی كۆمیسیارانی سەر بەکۆمیسیۆنی باڵای هەڵبژاردنەكانی عێراق بەSNNی ڕایگەیاند: بە نوێنەرایەتی 75 کەس لە ھاوڵاتیانی دڵسۆزی خاك و نیشتمانەکەمان و لە ڕێگای نوسینگەی ھەڵبژاردنەکان لە سلێمانی، سکاڵایەکی یاساییم لەسەر سەرۆك و بەرپرسی یەکەمی سێ لایەنی سیاسی عێراقی تۆمارکرد.
ئاماژەی بەوەشکرد، سکاڵاکە لەسەر سەڵاحەدین بەهادین ئەمینداری گشتی یەكگرتووی ئیسلامی كوردستان، شاسوار عەبدولواحید سەرۆكی جوڵانەوەی نەوەی نوێ، عیرفان عەلی عەبدولعەزیز رابەری گشتی بزوتنەوەی ئیسلامی تۆمارکراوە.
ئەو ئەندامەی پێشووی ئەنجومەنی کۆمیسیاران ئەوەشی خستەڕوو، ئەم بەرپرسانە بوونەتە ھۆکار بۆ دەستێوەردانی وڵاتانی دیکە لە کاروباری ناوخۆیی ھەرێمی کوردستان و دەوڵەتی عێراقی فیدراڵ بەدەر لە ڕێکارە پرۆتۆکۆڵی و دیپلۆماسیەکانی سێ دەسەڵاتە فەرمییە بەرقەرارەکانی یاسادانان و جێبەجێکار و دادوەری.
