سەرۆکی کۆریای باشوور دەستگیرکرا

SNN-

دوای دوو هەفتە لە دەرچوونی بڕیاری دادگ، یۆن سوک یۆل، سەرۆکی لەکارلادراوی کۆریای باشوور لەسەر دۆسییەی سەپاندنی باری لەناکاو لە وڵاتدا دەستگیرکرا و رەوانەی بارەگای دەستەی لێکۆڵینەوەی گەندەڵیی بەرپرسانی پلەباڵا کرا.

یەکەمین جارە لە مێژووی کۆریای باشوور سەرۆکێک لەکاتی خولی سەرۆکایەتیدا دەستگیردەکرێت.

یوون سووک یۆل بەر لە دەستگیرکردنی رایگەیاند، رازییە بە لێپرسینەوە ، ئەگەرچی نایاساییە و لەپێناو ئەوەدایە خوێن نەڕژێت”.

رۆژی سێشەممە 03-12-2024، سەرۆکی کۆریای باشوور باری لەناکاوی لە وڵاتەکە راگەیاند، دەسەڵاتی مەدەنی هەڵپەسارد و دەسەڵاتی سەربازی خستەکار. هەروەها سەرجەم چالاکییە سیاسییەکانی وڵاتەکەی قەدەغە کرد و وتیشی، میدیا و بڵاوکراوەکان دەبێت لەژێر کۆنتڕۆڵی سەربازیدا بن.

بڕیارەکە ناڕەزاییێکی زۆری لێکەوتەوە، ئەندامانی پەرلەمان لە باڵەخانەی پەرلەمان کۆبوونەوە و دوای شەش کاتژمێر هەنگاوەکەی سەرۆکیان رەتکردەوە.

رۆژی 31ـی مانگی رابردوو، دادگایەکی کۆریای باشوور بڕیاری دەستگیرکردنی بۆ یۆن سوک یۆل، سەرۆکی لەکارلابراوی وڵاتەکەی دەرکرد، ئەوەش دوای ئەوەی باری نائاسایی لە وڵاتەکە راگەیاندبوو.