دوو باڵەكەی بزوتنەوەی گۆڕان لە گردەكە و لە گەڕەكی كوردسات دوو كۆنفرانس ئەنجام دەدەن

SNN-عەلی حەمە سەعید

لەگەڵ ئەوەی چەند هەوڵێك هەبوون بۆ ئەوەی هەردوو باڵەكەی بزوتنەوەی گۆڕان یەك بگرنەوە و پێكەوە یەك كۆنفرانسی نشتیمانی ئەنجام بدەن، بەڵام هەوڵەكان شكستیان هێناوە و باڵی ڕێكخەری ئێستا لەگەڕەكی كوردسات و باڵی كوڕانی نەوشیروان مستەفا لە گردەكە ئامادەكاری دەكەن بۆ بەستنی كۆنفرانسی نیشتیمانی.

بەگوێرەی ئەو زانیارییانەی كە لە ئەندامێكی جڤاتی نشتیمانی بزوتنەوەی گۆڕان لە باڵی كوڕانی نەوشیروان مستەفا بە SNNدراون ئەوەخراوەتەڕوو، ئێستا بزوتنەوەی گۆڕان بووە بە دوو بەشەوە هەر بەشێكیش خۆی بەخاوەنی گۆران دەزانێت، بەجۆرێك بەشی دانای ئەحمەد مەجید كە ئێستا ڕێكخەری گشتیە لە گەڕكی كوردسات بارەگای سەركی كردووەتەوە و  بەشی كوڕانی نەوشیروان مستەفاش لە گردەكە بارەگای سەركیان هەیە و هەردولاشیان ئامادەكاری دەكەن بۆ بەستنی كۆنفراسی نشتیمانی.

ئاماژە بەوەشكراوە، هەولێك هەبوو بۆ ئەوەی ئەو دوو باڵەی بزوتنەوەكە یەك بگرنەوە و پێكەوە كۆنفرانسی نشتیمانی ببەستن، بەڵام هەردوو باڵەكەی بزووتنەوەی گۆڕان پێكەوە كۆنفرانس ناكەن لەكاتێكدا كۆمیسیۆنی باڵای سەربەخۆی هەڵبژاردنەكانی عێراق شەش مانگی بۆ بزووتنەوەی گۆڕان داناوە بۆ ئەوەی چەند گۆڕانكارییەك لەناوخۆدا بكات و كۆنفرانس ببەستێت.

هەر لە زانیارییەكانی SNNئەوەشهاتووە كە  ئێستا پرسی بەستنی كۆنفرانسی بزووتنەوەكە بووەتە بابەتی سەرەكی كاركردنی هەردوو باڵەكەی بزوتنەوەی گۆڕان و دەیانەوێت بە بەستنی كۆنفرانس بابەتی خاوەنداری بزوتنەوەكە لای كۆمیسیۆن یەكلایی بكەنەوە، بەڵام دیار نییە كۆمیسیۆن چۆن مامەڵە لەگەڵ ئەم دوو باڵەی بزوتنەوەی گۆڕان دەكات.