بایدن وتاری ماڵئاوایی پێشکەش کرد

SNN-

سەرۆکی ویلایەتە یەکگرتوەکانی ئەمریکا پێش رادەستکردنی دەسەڵات بە دۆناڵد ترەمپ وتاری ماڵئاوایی پێشکەشکرد و رایگەیاند، ئەمریکا رووبەڕووی چڕبوونەوەی مەترسیداری دەسەڵات دەبێتەوە لە دەستی مشتێک کەسی زۆر دەوڵەمەند، ئەمەش هەڕەشەیەکی راستەوخۆیە بۆ سەر دیموکراسی و ئەو بەها بنچینەییانەی کە گەلی ئەمریکا پابەندە پێیانەوە.

سەرۆکی ئەمریکا رایگەیاند: دوای چەند مانگ لە دانوستان و گفتوگۆی دیپلۆماسی لەلایەن ئەمەریکا، میسر و قەتەر هەروەها گۆڕانكاری هاوكێشەیی لەناوچەكە و لاوازبونی ئێران، ئیسرائیل و حەماس گەیشتن بەڕێککەوتن ئەوەش دەرئەنجامی دیپلۆماسیەتی وڵاتەكەیەتی.

وتیشی: ئەم ڕێککەوتنە دەبێتە هۆی وەستاندنی جەنگی غەززە و گەیاندنی یارمەتی مرۆیی پێویست بۆ خەڵکی مەدەنی فەلەستینی، هەروەها دوای زیاتر لە (15) مانگ بارمتەکان دەگەڕێنێتەوە بۆ ناوخێزان و بنەماڵەکانیان.

سەرۆکی ئەمەریکا راشیگەیاند: دوای ئەوەی وردەكاری پلانی ئاگربەستی داڕشت، لەلایەن ئەنجومەنی ئاسایشی نەتەوە یەكگرتوەكانەوە پەسەندكرا و ئێستا کاتی ئەوە هاتوە کە جەنگ لە كەرتی غەززە کۆتایی پێبێت و هەوڵەکان بۆ بەدەستهێنانی ئاشتی و دابینكردنی ئاسایش بۆ دانیشوانی هەردو وڵات فەراهەمبهێنرێت.

سەبارەت بەبارمتە ئەمەریكییەكانیش لە غەززە، جۆ بایدن وتی: چارەنوسی هەرچوار بارمتە ئەمەریكییەكە لە رێككەوتنەكەی نێوان حەماس و ئیسرائیل یەكلایی كراوەتەوە و سەرجەمیان دەگەڕێنەوە بۆ ماڵەوە و دڵخۆشە بەگەڕانەوەیان بۆناو خێزانەكانیان.

وتیشی: بەردەوامبونی ئاگربەستەکە پەیوەستە بە بەردەوامبونی دانوستانەکانە، ئیسرائیلیش لە شەش هەفتەی داهاتودا گفتوگۆ لەسەر قۆناغی داهاتوی ئاگربەست ئەنجام دەدات، رێككەوتنەكە لەسەردەمی ئیدارەکەیدا واژۆكراوە و لەلایەن دۆناڵد ترەمپ، سەرۆکی هەڵبژێردراوی ئەمەریکاوە جێبەجێ دەکرێت.