لەسەر خراپ بەكارهێنانی دەسەڵاتەکانیان پەرلەمانی عێراق لێپرسینەوە لە ژمارەیەك وەزیر دەكات

SNN-عەلی حەمە سەعید
بڕیاردەری فراكسیۆنی یەكێتی لە پەرلەمانی عێراق ئاماژەبەوەدەكات بەهۆی خراپ بەكارهێنانی دەسەڵاتەكانیان، ڕێكارەكانی لێپرسینەوە لەگەڵ پێنج وەزیری كابینەكەی محەمەد شیاع سودانی تەواو بوون و لە پەرلەمان لێپرسینەوەیان لەگەڵ دەكرێت.

كاروان یاروەیس، بڕیاردەری فراكسیۆنی یەكێتی لە ئەنجومەنی نوێنەرانی عێراق بە SNNی ڕاگەیاند: وەك ئەركێكی پەرلەمانی كە چاودێریكردن و لێپرسینەوەیە لە بەرپرسانی حكومەت بە تایبەت وەزیرەكان، لە ئێستادا ڕێكارەكانی لێپرسینەوە لە پێنج وەزیری كابینەكەی (محەمەد شیاع سودانی) بەكۆتا گەیشتوون، كە بریتین لە وەزیرانی نەوت، گواستنەوە، بەرگری، گواستنەوە و گەیاندن و ئاوەدانكردنەوە.

ئاماژەی بەوەشكرد، لێپرسینەوەكە لەناو هۆڵی پەرلەمان بەڕێوەدەچێت، هاوكات دەستەی دەستپاكی لەسەر بنەمای بڕیاری دەستەی سەرۆكایەتی پەرلەمان نووسراوی بۆ وەزیری نەوت و سەرۆكی دەستەی راگەیاندن و گەیاندن كرد بۆ لێپرسینەوە، هاوكات هەندێك لە وەزیرەكان رێكاری لێپرسینەوەیان تەواو بووە و هەندێكی دیكەیان لە قۆناغی كۆتایی دایە.

بڕیاردەری فراكسیۆنی یەكێتی لە ئەنجومەنی نوێنەرانی عێراق ئەوەشی خستەڕوو، داواكاری لێپرسینەوە لەوەزیری نەوت و وەزیری گەیاندن و سەرۆكی دەستەی ڕاگەیاندن، لەسەر داوای دوو پەرلەمانتاری فراكسیۆنی ئیشراقییەی كانوون بووە، هاوكات وەزیرەكانی دیكەش لەسەر خراپ بەكارهێنانی دەسەڵات و سەرپێچی وبەهەدەردان و گومانی گەندەڵی لەلایەن پەرلەمانتارانی فراكسیۆنە جیاوازەكانەوە داوای لێپرسینەوەیان لەسەر تۆماركراوە