راگەیەندراوێک لە مەزڵوم عەبدییەوە لەبارەی کۆبوونەوەی لەگەڵ مەسعود بارزانی

SNN-

مەزڵوم عەبدی رایگەیاند، دیدارەکەی لەگەڵ مەسعود بارزانی جێگەی دڵخۆشی بووە، دەشڵێت:” گفتوگۆیان لەبارەی گۆڕانکارییەکانی سووریا کردووە و بە هاوبەشی جەختیان لە یەکڕیزیی هەڵوێستی کورد کردەوە، هەروەها بە پێویستیان زانیوە کە گفتوگۆ لەگەڵ دیمەشق دەبێت پارێزگاری لە مافەکانی گەلی کورد بکات”.

مەزڵوم عەبدى فەرماندەى هێزەکانى سوریاى دیموکرات، ئەمڕۆ هەینى لە تۆڕى کۆمەڵایەتى ئێکس لە راگەیەندراوێکدا دەڵێت:”لە کۆبوونەوەکە باسمان لەو پرۆسەی گۆڕانکارییە کرد، کە سوریا پێیدا تێدەپەڕێت، هەردوولاشمان جەختمانکردەوە، دەبێت کورد بۆ ئەم قۆناغە یەکگرتوو بێت.

دەشڵێت:”باسمان لە گفتوگۆ لەگەڵ دیمەشقیش کردووە و جەختمان لە بەدەستهێنانى مافەکانى کورد لە سوریا کردووەتەوە، هەروەها جەختمان لە گرنگی یەکڕیزی کورد کردووەتەوە، چونکە سەقامگیری ناوچەیی بە گشتی لە ئەستۆی هەموومانە و لەو چوارچێوەیە هاوکارى یەکتر دەبین.

رۆژى پێنجشەممە 16-1-2025, مەسعود بارزانى و مەزڵوم عەبدى لە هەولێر کۆبوونەوە.