بۆ یەكلاكردنەوەی مووچەی مانگی 12 ئەمڕۆ شاندی هەرێمی کوردستان دەچنەوە بەغدا

SNN-عەلی حەمە سەعید

بەمەبەستی یەكلاكردنەوەی مووچەی مانگی 12ی ساڵی ڕابردوو، چۆنییەتی مامەڵەكردن لەگەڵ دابەشكردنی مووچەی ئەمساڵی فەرمانبەران، ئەمڕۆ یەكشەممە شاندێكی باڵای هەرێم بەسەرۆكایەتی وەزیری دارایی دەچنە بەغدا و لەگەڵ وەزیری دارایی عێراق كۆدەبنەوە.

بەگوێرەی زانیارییەكانیSNN، لەسەر داوای سەرۆكی حكومەتی هەرێم ئەمڕۆ یەكشەممە شاندێكی هەرێمی كوردستان كە پێكدێن لە هەریەكە لە ئاوات شێخ جەناب، وەزیری دارایی، ئومێد سەباح، سەرۆكی دیوانی ئەنجومەنی وەزیران، ئامانج ڕەحیم، سكرتێری ئەنجومەنی وەزیران سەردانی بەغدا دەكەن و لەگەڵ وەزیری دارایی عێراق كۆدەبنەوە.

بەگوێرەی زانیارییەکان شاندەكەی هەرێم دەیانەوێت لەگەڵ ( محەمەد شیاع سودانی) سەرۆكوەزیرانی عێراقیش كۆببنەوە، بەڵام تاوەکو ئێستا یەكلایی نەبووەتەوە ئاخۆ ئەو كۆبوونەوەیە بەڕێوەدەچێت یاخود تەنها لەگەڵ وەزیری دارایی عێراق كۆدەبنەوە، هاوكات شاندەكە بۆ تاوتوێكردنی پرسی مووچەی فەرمانبەرانی هەرێمی كوردستان بەگشتی، مووچەی كانوونی یەكەمی 2024 و پرسە ئابوورییەكانی تری نێوان هەولێر و بەغدا ئەو سەردانە دەكات.

سەردانی ئەو شاندەی هەرێم لەكاتێكدایە كە وابڕیارە هەر ئەمڕۆ لیژنە لاوەكییەی لیژنەی دارایی پەرلەمانی عێراق دەستبەكارەكانی بكات بۆ دەرخستنی ڕاستییەكان لەبارەی ئەو ژمارانەی كە لەنێوان هەولێر و بەغدا هەن لەبارەی مووچەی فەرمانبەرانی هەرێم.