كۆبوونەوەی شاندی هەرێم و وەزیری دارایی عێراق دەستپێكرد
SNN-عەلی حەمە سەعید
بەمەبەستی یەكلاكردنەوەی مووچەی مانگی 12 ی ساڵی ڕابردوو هەروەها چۆنییەتی مامەڵەكردن لەگەڵ دابەشكردنی مووچەی ئەمساڵی فەرمانبەران، ئەمڕۆ دوو شەممە شاندەكەی هەرێم بەسەرۆكایەتی وەزیری دارایی لە بەغدا لەگەڵ وەزیری دارایی عێراق دەستیان بە كۆبوونەوەكانیان كرد.
بەگوێرەی زانیارییەكانی SNNدوای ئەوەی دوێنێ شاندێكی هەرێم سەردانی بەغدایان كرد ئەمڕۆ دووشەممە شاندەكەی هەرێمی كوردستان كە پێكدێن لە هەریەكە لە ئاوات شێخ جەناب وەزیری دارایی، ئومێد سەباح سەرۆكی دیوانی ئەنجومەنی وەزیران، ئامانج ڕەحیم سكرتێری ئەنجومەنی وەزیران، لەماڵی فواد حسێن لەگەڵ ( تەیف سامی) وەزیری دارایی عێراق دەستیان بەكۆبوونەوە كردووە.
ئاماژە بەوەشكراوە، جگە لەوەزیری دارایی عێراق هەریەكە لە بریكاری وەزیری دارایی و بەڕێوەبەری گشتی بودجە و بەڕێوەبەری ژمێریاری بودجە لەوەزارەتی دارایی عێراق بەشدارن لە كۆبوونەوەكە، هاوكات شاندەكەی هەرێم مەبەستیشیانە لەگەڵ ( محەمەد شیاع سودانی) سەرۆكوەزیرانی عێراقیش كۆببنەوە، بەڵام تا ئێستا یەكلایی نەبووەتەوە ئاخۆ ئەو كۆبوونەوەیە بەڕێوە دەچێت یاخود تەنها لەگەڵ وەزیری دارایی عێراق كۆدەبنەوە.
هەر لە زانیارییەكانی SNNئەوەشهاتووە كە كۆبوونەوەی شاندەكە بۆ تاوتوێكردنی پرسی مووچەی فەرمانبەرانی هەرێمی كوردستان بەگشتی، مووچەی كانوونی یەكەمی 2024 و پرسە ئابوورییەكانی تری نێوان هەولێر و بەغدا ئەو سەردانەیان كردووە.
