“ئەو بەڵێنەی پەرلەمانتارانی یەكێتی بە كەركوكییەكانیان دابوو بەجێیان گەیاند”
SNN-عەلی حەمە سەعید
دوای ئەوەی ئەمڕۆ لە هۆڵی پەرلەمانی عێراق پرۆژەیاسای گەڕانەوەی موڵك و زەوی بۆ هاووڵاتیانی كەركوك و ناوچە دابڕاوەكانی كوردستان پەسەندكرا، پەرلەمانتارانی یەكێتی جەخت لەوەدەكەنەوە كە ئەوەی ڕوویدا لە ئەنجامی هەوڵی بەردەوامی سەرۆكی یەكێتی و فراكسیۆنی یەكێتی بوو.
سەباح حەبیب، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: پەسەندكردنی پرۆژەیاسای هەڵوەشاندنەوەی بڕیارەكانی بەعسی لەناوچوو گەڕاندنەوەی زەویەكانی كەركوك و ناوچەكانی مادەی 140 گەڕاندنەوەی بۆ خاوەنەكانیان كە كوردو توركمانن، ئەمە كارێكی ئاسان نەبوو، بەڵكوو بەهەوڵی بەردەوامی فراكسیۆنی یەكتی بوو لە پەرلەمان.
ئاماژەی بەوەشكرد، ئێمە وەك نوێنەرانی كوردانی كەركوك لە پەرلەمانی عێراقین ئەو بەڵێنانەی كە بەهاووڵاتیانی خۆمانماندابوو وەك خۆی بەجێمان گەیاند لە گەڕانەوەی موڵك و زەوییە داگیركراوەكان بۆ كورد و توركمان و هەڵوەشاندنەوەی بڕیارەكانی ڕژێمی بەعس كە تەنها لەبەرژەوەندی نەتەوەیەكی دیاریكراو دەركرابوون.
ئەو پەرلەمانتارەی فراكسیۆنی یەكێتی ئەوەشی خستەڕوو، بەدڵنیاییەوە نابێت هەوڵەكانی ( بافل جەلال تاڵەبانی) سەرۆكی یەكێتی بە نادیدە بگیرێت، چونكە لە زۆربەی سەردانەكانی سەرۆكی یەكێتی بۆ بەغدا یەكێك لەو مەلەفانەی كە سەرۆكی یەكێتی لەگەڵ لایەنەكانی عێراق گفتوۆگی لەبارەوە دەكرد پەیوەندی بەو پرۆژە یاسایەوە هەبوو كە ئەمڕۆ لە پەرلەمان دەنگی لەسەر دراو پەسەندكرا.
