ئێران: چیتر فشار لە ژنان و کچان ناکەین بۆئەوەی سەرپۆش بکەن

SNN-

حکومەتی ئێران رایگەیاند، بەشێک لە ژنانی وڵاتەکە لە شوێنە گشتییەکان سەرپۆش ناکەن سەرەڕای ئەوەی نایاسییە، بەڵام چیتر فشاریان لێ ناکەن بۆئەوەی سەرپۆش بکەن.

محەمەد جەواد زەریف، راوێژکاری سەرۆکی ئێران بۆ کاروباری ستراتیژی لە کۆڕبەندی ئابووری جیهانیی داڤۆس رایگەیاند، ئەگەر بە شەقامەکانی تاراندا بڕۆن، دەبینن هەندێک لە ژنان سەرپۆشیان لەسەر نییە، سەرەڕای ئەوەی کە ئەم کارە نایاساییە، بەڵام حکومەت بڕیاری داوە فشار نەخاتە سەر ژنان.

ئاماژەی بەوەشکردووە، ئەم بڕیارە بە ڕەزامەندی بەرپرسانی وڵاتەکە دراوە و جێبەجێ دەکرێت.

ئەمەش لە کاتێکدایە، لەنێو دەسەڵاتدارانی ئێرانیشدا رای جیاواز لەبارەی باڵاپۆشی هەبووە، سەرۆککۆمار پشتگیری لە مامەڵەی نەرم بەرامبەر بە ژنان و کچان کردووە، بەڵام لایەنی دیکەش لەنێو دەسەڵات هەبووە، سازش لەسەر بابەتی لەچک و باڵاپۆشی ناکەن..