نوخشە ناسیح، قائیمقامی هەڵەبجە: هەڵەبجە لە بۆشایی یاساییدایە

SNN-عەلی حەمە سەعید

قائیمقامی ناوەندی پارێزگای هەڵەبجە ئاشكرایكرد كە لە دوێنێوە پارێزگاری هەڵەبجە و جێگرەكەی دەستیان لە كارەكانیان هەڵگرتووە بە هۆی خانەنشینبوونیانەوە، ئێستا كەس نییە ئیش و كارەكانی پارێزگا ڕاپەڕێنێت و واژۆ لەسەر نوسراوەكان بكات، وەزارەتی ناوخۆش كەسی بۆ جێگرەوەیان ڕانەسپاردووە.

نوخشە ناسیح، قایقامی ناوەندی پارێزگای هەڵەبجە بە SNNی ڕاگەیاند: دوای ئەوەی بە گوێرەی یاسایی خانەنشینی هەریەكە لە ( ئازاد تۆفیق) پارێزگاری هەڵەبجە و ( شاهێن حەمە ڕەزا) جێگری پارێزگای هەڵەبجە خانەنشین بوون، لە دوێنێوە ڕۆشتوونەتەوە ماڵەوە و ئێستا لە دیوانی پارێزگای هەڵەبجە كەس نییە واژۆ لەسەر نوسراوەكان بكات و ئیش و كارەكان راپەڕینێت.

ئاماژەی بەوەشكرد، تا ئەمڕۆش وەزارەتی ناوخۆی حكومەتی هەرێم هیچ كەسێكی ڕانەسپاردووە بۆ ئەوەی ئەگەر بەشیوەیەكی كاتیش بێت ببێتە جێگرەوەی پارێزگاری هەڵەبجە بۆ ڕاپەڕاندنی ئیش و كارەكان و ئێمەش نازانین وەزارەتی ناوخۆ كێ‌ ڕادەسپێرێت.

قائیمقامی قەزای ناوەندی هەڵەبجە ئەوەشی خستەڕوو، لەڕووی یاساییەوە من ناتوانم لە بری پارێزگاری هەڵەبجە واژۆ لەسەر نوسراو بكەم یان ببمە جێگرەوەی پارێزگار تا ئەوكاتەی لەلایەن وەزارەتی ناوخۆوە ڕانەسپێردرێم، بۆیە ئێستا هەڵەبجە لە بۆشایی یاسایدایە و دەبێت وەزارەتی ناوخۆ ئەو پرسە چارەسەر بكات.