ئەم مانگە ژمارەیەک هاووڵاتی بەشەخۆراکیان دەبڕدرێت

SNN-عەلی حەمە سەعید

بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم ئاماژە بەوەدەكات بەگوێرەی ڕێنماییەكانی وەزارەتی بازرگانی عێراق، هەر هاووڵاتییەك كارتی نشتیمانی نەبێت بەشەخۆراكی مانگانە دەبڕدرێت، هاوكات هەر فەرمانبەرێكیش مووچەكەی سەروو دوو ملیۆن دیناربێت ئەوا بەشەخۆراكی پێنادرێت.

نەوزاد شێخ كامیل، بەڕێوەبەری گشتی بازرگانی لە وەزارەتی بازرگانی و پیشەسازی حكومەتی هەرێم بە SNNی ڕاگەیاند: بۆ ئەمساڵیش پێدان و دابەشكردنی بەشەخۆراكی مانگای هاووڵاتیان لە لایەن بریكارەكانی خۆراكەوە بەردەوامی دەبێت، بەڵام ئەگەر كەسێك خاوەنی كارتی نشتیمانی نەبێت ئەوا بەشەخۆراكی مانگانەی ڕادەگیرێت.

ئاماژەی بەوەشكرد، هەر بەگوێرەی ڕێنماییەكانی وەزارەتی بازرگانی عێراق، ئەو فەرمانبەرانەی كە مانگانە داهاتەكانیان دەگاتە سەروو دوو ملیۆن دینار، بەهەمان شێوە ئەوانیش بەشەخۆراكی مانگانەیان ڕادەگیرێت و پێیان نادرێت، بەڵام دەتوانن ببنە خاوەنی فۆڕمی خۆراك و فۆڕمەكەیان هەڵدەپەسێندرێت.

ئەو بەرپرسەی وەزارەتی بازرگانی و پیشەسازی حكومەتی هەرێم ئەوەشی خستەڕوو، هاوشێوەی ساڵانی ڕابردوو، بۆ ئەمساڵیش لە مانگی ڕەمەزاندا جگە لەو مادانەی كە لەبەشەخۆراكی مانگانە بەسەر هاووڵاتیاندا دابەشكراوە دوو مادەی دیكەش كە بریتین لە ( هێلكە و ئاردی سفر) بەسەر هاووڵاتیاندا دابەشدەكرێت و ئامادەكاریش بۆ ئەومەبەستە كراوە.