“پەسەندكردنی هەمواری یاسای بودجە بۆ چارەسەركردنی گرفتی دواكەوتنی مووچەی فەرمانبەرانە”
SNN-عەلی حەمە سەعید
ئەندامێكی ئەنجومەنی نوێنەرانی عێراق لە فراكسیۆنی یەكێتی ئاماژە بەوەدەكات لە بنەڕەتدا هەمواركردنەوەی پرۆژەیاسای بودجەی گشتی عێراق بۆ نەهێشتنی ئەو بیانوانەیە كە لایەنە عێراقییەكان هەیانبوو كە دەیان وت هەرێم نەوت هەناردەناكات چۆن دەبێت پارەی بۆرەوانەبكرێت،
سروە محەمەد، ئەندامی ئەنجومەنی نوێنەرانی عێراق لە فراكسیۆنی یەكێتی بە SNNی ڕاگەیاند: لە دانیشتنەكەی ئەمڕۆدا هەنگاوێكی زۆر گەورە و گرانمان نا بە ئاراستەی چارەسەركردنی گرفتەكانی نێوان هەرێم و عێراق ئەویش دەستكردنەوەیە بە هەناردەكردنەوەی نەوت لەڕێگەی كۆمپانیای سۆموە، ئەمەش وادەكات گرفتی مووچەی فەرمانبەران چارەسەر ببێت.
ئاماژەی بەوەشكرد، پەسەندكردنی ئەم هەموارە پەیوەندی ڕاستەوخۆی بە مووچەی فەرمانبەرانی هەرێمەوە هەیە، چونكە بەشێكی زۆری بیانووی حكومەتی عێراق و وەزارەتی دارایی كە مووچەیان دوادەخست یاخود نەیاندەنارد ئەوەبوو كە دەیان وتو هەرێم نەوت ڕادەستناكات و داوای پارەش دەكات، بەڵام ئێستا ئەو بیانووەشیان نەماوە و لەدوای بلاوبوونەوەی هەموارەكە لە ڕۆژنامەی وەقایع، ڕاستەخۆ دەستدەكرێتەوە بە هەناردەكردنەوەی نەوتی هەرێم لەڕێگەی كۆمپانیای سۆموە.
ئەو ئەندامەی ئەنجومەنی نوێنەرانی عێراق ئەوەشی خستەڕوو، بە گوێرەی هەموارەكە نرخی دەرهێنان و گواستنەوەی هەر بەرمیلێك نەوتی هەرێم بە 16 دۆلار دیاریكراوە، ئەو بڕەپارەیەش بۆ ماوەی دوومانگ كاری پێدەكرێت، پاشان لەلایەن لایەنی راوێژكاری تایبەتمەندی نێودەولەتییەوە پێداچوونەوە بەو نرخە دەكرێت كە دیاریكراوە بە زیاد كردبێت یاخود كەمكردنەوە.
