شیروان میرزا: بابەتی مووچەی ساڵی ڕابردوو لا حکومەتی عێراق داخراوە

SNN-عەلی حەمە سەعید

دوای ئەوەی ئێوارەی ئەمڕۆ وەزیری دارایی هەرێم ڕێككەوتنی نێوان هەرێم و بەغدای لەسەر چارەسەركردنی گرفتی مووچە ڕاگەیاند، بەڵام هیچ ئاماژەیەكی بە دابەشكردنی مووچەی مانگی 12ی فەرمانبەران نەكرد، ئەندامێكی لیژنەی دارایی لە خولی پێشووی پەرلەمانی عێراقیش دەڵێت” ئەو مەلەفە لای عێراق داخراوە”

شیروان میرزا، ئەندامی لیژنەی دارایی لە خولی پێشووی پەرلەمانی عێراق بە SNNی ڕاگەیاند: ئەوەندەی تێبینمان كرد لە قسەكانی وەزیری دارایی هەرێم بە هیچ جۆرێك باسی لە مووچەی مانگی 12ی فەرمانبەرانی هەرێم نەكرد، ئەوەش ئەوە دەگەیەنێت كە عێراق ئامادە نەبووە ئەو بابەتەیان لەگەڵ باس بكات و پێشتریش وەزارەتی دارایی عێراق جەختیان لەوەكردووەتەوە كە بابەتی مووچەی ساڵی ڕابردوو داخراوە و ئامادەی گفتوگۆكردن نین لەسەری.

ئاماژەی بەوەشكرد، حكومەتی هەرێم داهێنەری لێبڕینی مووچە و پاشەكەوتكردنی مووچەبوو لە ساڵانی داهاتوو، بۆیە ئەگەر نەتوانێت بەداهاتی ناوخۆ ئەو مووچەیە دابەشبكات ئەوا بێگومان چارەنووسی مووچەی مانگی 12ی فەرمانبەرانیش وەك چارەنووسی ئەو مووچانەی لێدێت كە ساڵانی ڕابردوو بەناوی لێبڕین یان پاشەكەوتەوە دابەشنەكراوە.

ئەو ئەندامەی لیژنەی دارایی لە خولی پێشووی پەرلەمانی عێراق ئەوەشی خستەڕوو، لەگەڵ ئەوەی ئێمە ئومێدەوارین كە ئەم ڕێككەوتنەی ئەم جارە وەك خۆی بۆ ماوەی 12 مانگ جێبەجێبكرێت، بەڵام  لە عێراق هیچ ڕێككەوتنێك گەرەنتی نییە بۆ ئەوەی وەك خۆی جێبەجێبكرێت، چونكە دەبینین لە عێراق پێشێلی دەستور و یاسا و بریارەكانی دادگای فیدراڵیش دەكرێت و كەسیش نییە قسە بكات، بۆیە لە حاڵەتی پابەند نەبوونی هەرلایەك بەتایبەت هەرێم ئەوا ئەگەری هەیە ئەم ڕێككەوتنەش وەك خۆی جێبەجێنەكرێت كە ئومێدەوارین ئەوە ڕوونەدات.