بەپێی ڕێككەوتنەكەی هەرێم ودارایی عێراق ئەمساڵ دامەزراندن نیە وگرێبەستەكانیش ناكرێن بەهەمیشەیی
SNN-عەلی حەمە سەعید
بەگوێرەی ئەو رێككەوتنەی كە لەنێوان هەردوو شاندی وەزارەتی دارایی هەرێم و وەزارەتی دارایی عێراق كراوە ئەو لیستەی كە بۆ مووچەی مانگی یەك ڕادەستی عێراق كراوە تا 31/12 هیچ گۆڕانكاریەكی تێدا ناكرێت، بەوجۆرەش ئەمساڵ هیچ دامەزراندنێكی نوێ نییە و گرێبەستەكانیش ناكرێنە هەمیشەیی.
بەپێی بەدواداچوونەكانی SNNبەگوێرەی ئەو ڕێككەوتنەی كە لە نێوان هەردوو شاندی وەزارەتی دارایی هەرێم و وەزارەتی دارایی عێراق كراوە، كۆتایی بە گرفتی لیستی مووچە هاتووە ئەو لیستەی ئێستا لای حكومەتی عێراقە بەشێوەی ئەلیكترۆنییە و دەستكاری ناكرێت لە زیاد و كەمكردنی ناوی فەرمانبەران.
ئاماژە بەوەشكراوە، مانگانە ئەو بڕە پارەیەی كە بۆ مووچەی فەرمانبەرانی هەرێم تەرخاندەكرێت لە نێوان 950 تا 960 ملیار دینار دەبێت، ئەوەش بەگوێرەی گۆڕانكاری لەسەرە مووچە و مۆڵەتی دایكایەتی و مۆڵەتی بێ مووچە ڕوودەدەن، ئەو بڕە پارەیەش تا 31/12/2025 بۆ فەرمانبەرانی هەرێم بەردەوام دەبێت بەومەرجەی هەرێمی كوردستانیش دەستبكاتەوە بە هەناردەكردنەوەی نەوت و هەروەها ڕادەستكردنی لە %50ی داهاتی ناوخۆ بە وەزارەتی دارایی عێراق.
هەر لە بەدواداچوونەكانی SNNئەوەشهاتووە كە بۆ ئەمساڵ هیچ دامەزراندێنی نوێ لە داموودەزگاكانی حكومەتی هەرێم تۆمارناكرێن و هاوكات ئەو فەرمانبەرانەشی كە مووچەی مانگی یەك بە شێوەی گرێبەست وەردەگرن ئەوانیش ناكرێن بە هەمیشەیی، ئەوەش بەگوێرەی ئەو ڕێككەوتنەی كە لەنێوان شاندی دارایی هەریم و عێراق كراوە بۆ جیگیركردنی لیستی مووچەی ئەمساڵی فەرمانبەرانی هەرێم.
