ئەنجوومەنی باڵای دادوەری عێراق دژی راگرتنی سێ یاساکە وەستایەوە

SNN

ئەنجوومەنی باڵای دادوەری عێراق بریارەكەی دادگای فیدراڵی سەبارەت بە راگرتنی جێبەجێكردنی سێ یاسا رەتدەكاتەوە  و رایدەگەیەنێت، هەر تانەیەك كە لە یاسایەك دەدرێـت دەبێت دوای بڵاوكردنەوەی یاساكە بێت لە رۆژنامەی فەرمی دەوڵەت.

ئەمڕۆ چوارشەممە 5ی شوبات ئەنجومەنی باڵای دادوەری عێراق لە راگەیەنراوێکدا ئاشکرایکرد، لە كۆبوونەوەی ئەمڕۆی ئەنجومەنەكەدا تاوتوێی بڕیارەكەی دادگای فیدراڵی كراوە سەبارەت بە راگرتنی جێبەجێكردنی یاساكانی “گەڕاندنەوەی موڵك و ماڵ بۆ خاوەنە رەسەنەکانیان و باری كەسێتی و لێبوردنی گشتی”.

ئاماژە بەوەکراوە، دەبێت هەر تانەیەك كە لە یاسایەك دەدرێـت، دوای بڵاوكردنەوەی یاساكە بێت لە رۆژنامەی فەرمی دەوڵەت، بەڵام ئەو سێ یاسا لە رۆژنامەی فەرمی بڵاونەكراونەتەوە و دادگای فیدراڵی رایگرتوون.

هاوکات، بەپێی ماددەی 129 لە دەستوری عیراقی، نابێت هیچ یاسایەك كە بەڵگە لەسەر نادەستوری بوونی نەبێت رابگیرێت، هەربۆیە ئەنجومەنی دادوەری جەخت دەكاتەوە لەوەی، دەبێـت دادگای فیدراڵی پابەند بێت بە جێبەجێكردنی ئەو یاسایانەوە.